საქართველოს საგარეო საქმეთა სამნისტრო, ჩეხეთის პირველი პრეზიდენტის ვაცლავ ჰაველის გარდაცვალების გამო მწუხარებას გამოთქვამს. როგორც დღეს გამართულ ტრადიციულ ბრიფინგზე საქართველოს საგარეო საქმეთა მინისტრის მოადგილე ნინო კალანდაძემ განაცხადა, ჰაველის სახით საქართველომ ძალიან კარგი მეგობარი დაკარგა.
"ჰაველის გარდაცვალება არის დანაკლისი არა მხოლოდ ჩეხეთისთვის, არამედ მთელი მსოფლიოსთვის. საქართველომ ჰაველის სახით დაკარგა ძალიან კარგი მეგობარი. მტკიცე იყო მხარდაჭერა ჰაველის მხრიდან იმ პერიოდში, როდესაც საქართველოს ძალიან უჭირდა. 2008 წლის აგვისტოს ომის დროს მან სპეციალური განცხადება გააკეთა და რუსეთის ქმედებები დაუკავშირა საბჭოთა კავშირის 1968 წლის ქმედებებს, როდესაც მოახდინეც ჩეხეთის ოკუპაცია. ის სისტემატიურად მოუწოდებდა რუსეთს დეოკუპაციისკენ", - განაცხადა კალანდაძემ.
მისი თქმით, ჩეხეთის მხრიდან ინფორმაციის მიღების შემდეგ დაზუსტდება თუ რა შემადგენლობით გაემგზავრება საქართველოს დელეგაცია ჩეხეთში.
შეგახსენებთ, რომ 75 წლის ასაკში გარდაცვლილ ჩეხეთის პირველი პრეზიდენტს ვაცლავ ჰაველს 23 დეკემებრს დაკრძალავენ.
