თბილისის მერია პრესის ჯიხურებთან დაკავშირებით მორიგ განცხადებას ავრცელებს. განცხადების თანახმად, პრესის ჯიხურებთან ერთად დედაქალაქში აღებულია ყველა ის ჯიხური, რომელიც უნებართვოდ იდგა, ან ნებართვას ვადა ჰქონდა გასული.
"პრესის გამავრცელებლებს საშუალება აქვთ მონაწილეობა მიიღონ მერიის მიერ გამოცხადებულ აუქციონში. მომდევნო აუქციონები დაგეგმილია 28 დეკემბერსა და 4 იანვარს. შპს "ელვასერვისს" უკვე 17 ლოტზე აქვს გამარჯვება მოპოვებული. თუკი დაშვებული იქნება გამონაკლისი და გარკვეულ პირებს ჯიხურის ჩადგმის ნებართვა ინტერნეტაუქციონის გარეშე მიეცემათ, ეს გამოიწვევს იმ ადამიანების უფლებების დარღვევას, რომლებმაც აუქციონში მიიღეს მონაწილეობა და გაიმარჯვეს. იგივე მიზეზის გამო მერია ვერ დაუშვებს გამონაკლისს და უნებართვო ჯიხურებს ვერ დატოვებს ქალაქში, რადგან ამ შემთხვევაშიც ზარალდებიან ის მეწარმეები, რომლებმაც გაიმარჯვეს აუქციონში და იხდიან იჯარის გადასახადს", - აღნიშნულია განცხადებაში.
მერიის მტკიცებით, აუქციონში მონაწიელეებისთვის არ არსებობს შეზღუდვები, აქედან გამომდინარე მსურველებს შეუძლიათ პრესასთან ერთად ჯიხურში განათავსონ სხვადასხვა სახის პროდუქცია, როგორც ეს აქამდეც ჰქონდათ.
"ამით ისინი ჩვეულებრივ კონკურენტუნარიანები ხდებიან. როდესაც საუბარია, რომ ეს ბიზნესი ვერ გაუძლებს კონკურენციას, გაურკვეველია, რადგან პრესის ჯიხურებში აქამდეც იყიდებოდა თამბაქო, გამაგრილებელი სასმელები, თუ სხვა სახის პროდუქცია. ასევე ამ პირებს შეუძლიათ გააფორმონ ხელშეკრულებები გამარჯვებულ კომპანიებთან", - ნათქვამია განცხადებაში.
მერიის ინფორმაციით, დღემდე ჩატარებულია სულ ცხრა აუქციონი, სადაც გამოტანილი იყო 450 ლოტი, აქედან 136 ლოტზე გამოვლინდა გამარჯვებული, 314 ლოტზე კი განაცხადი არ ყოფილა შეტანილი.
"აქედან გამომდინარე, უსაფუძვლოა იმ ადამიანების პრეტენზია, ვინც აცხადებს, რომ კონკურენციას ვერ უძლებენ. შეგახსენებთ, რომ ნებისმიერ მსურველს შესაძლებლობა აქვს შევიდეს ვებ-გვერდზე: იაუცტიონ.გე დარეგისტრირდეს, აირჩიოს მისთვის სასურველი ადგილი, გადაიხადოს 500 ლარი ბე-ს სახით და ჩაერთოს ელექტრონულ აუქციონში. იჯარის წლიური საწყისი ფასი არის 1000 ლარი", -მიიჩნევენ მერიაში.
განცხადების თანახმად, ახალი პროექტი მცირე და საშუალო ბიზნესის ხელშეწყობის მიზნით დაიწყო.
"პროექტის მიხედვით, ქალაქში არსებული ძველი და უსახური ჯიხურების ნაცვლად, თბილისში უახლოეს მომავალში ახალი, თანამედროვე დიზაინის ჯიხურები დაიდგმება. თუკი აქამდე დედაქალაქის მაშტაბით 250-მდე ადგილზე იყო ჯიხურის ნებართვა გაცემული, დღეს ქალაქის მაშტაბით 1 000 ადგილია გამოყოფილი. თბილისის მერიის მიზანია, ყველა დაინტერესებული პირი თანაბარ პირობებში იყოს. ამიტომაც შეირჩა ოპტიმალური ვარიანტი ინტერნეტაუქციონის სახით. ყველა ფიზიკურ, თუ იურიდიულ პირს, ვისაც ნებართვის საფუძველზე უდგას ჯიხური, სანებართვო ვადის დასრულებამდე ჯიხურის აღება არ ევალება", - აღნიშნულია განცხადებაში.
