ტელეკომპანია მაესტროს ერთ-ერთი დამფუძნებელი მამუკა ღლონტი ყველა მედიასაშუალების ხელმძღვანელს მოუწოდებს რომ ორშაბათს თბილისი მარიოტში 12:00 საათზე მივიდნენ და ხელი მოაწერონ მემორანდუმს, რომელიც მედიასაშუალებების გაერთიანებას გულისხმობს.
"უნდა მოხდეს მედიასაშუალებების გაერთიანება. ეს უნდა დაეფუძნოს ნატოს პრინციპს, რომლისკენაც მივისწრაფვით. ეს აუცილებელია იმისთვის, რომ როდესაც მოხდება ერთ მედიასაშუალებაზე თავდასხმა, როგორც ახლა ხდება მაეტსტროსთან მიმართებაში, ყველა მედიასაშუალება დადგეს ერთად, რათა მსგავსი ფაქტები არ მოხდეს", - განაცხადა ღლონტმა ნუცუბიძის პირველ მიკრორაიონში პოლიციის შენობასთან მიმდინარე საპროტესტო აქციაზე.
მისივე თქმით, საჯარო რეესტრში დარეგისტრირებულ მაესტროს ოფიციალურ დირექტორ ილია კიკაბიძეს უნდა მიეცეს საშუალება რომ შევიდეს მაესტროს შენობაში.
"ამასში მას ხელს ეროსი კიწმარიშვილი უშლის. პოლიცია კი არაფერს აკეთებს იმისთვის, რათა ეს უკანონობა შეაჩეროს და კიწმარიშვილი აღნიშნული ტელეკომპანიის ტერიტორიიდან გამოაძევოს. მაესტროს ჟურნალისტებს უნდა მიეცეთ საშუალება მუშაობის, ხოლო ტელეკომპანიას კი ნორმალური მაუწყებლობის", - განაცხადა ღლონტმა.
