საქართველოში დონალდ ტრამპის ვიზიტი გადაიდო. როგორც სააგენტო "ჯი-ეიჩ-ენს" "სილქროუდ ჯგუფში" განუცხადეს, ცნობილი ამერიკელი მილიარდელი საქართველოში, ხვალ, 17 დეკემბერს (როგორც დაგეგმილი იყო) აღარ ჩამოვა. როგორც კომპანიაში განმარტავენ, ამ დროისათვის უცნობია, თუ როდის ჩამოვა The Trump Organization-ის დამფუძნებელი საქართველოში.
დღემდე ვრცელდებოდა ინფორმაცია, რომ "ბათუმის ტრამპ თაუერის" მშენებლობის გენერალური გეგმის პრეზენტაციისთვის The Trump Organization-ის დამფუძნებელი დონალდ ტრამპი, 17-18 დეკემბერს უნდა ჩამოსულიყო.
აღნიშნულის შესახებ ინფორმაციას ადასტურებდნენ, როგორც "სიქროდ ჯგუფში" ასევე თავად ტრამპის კომპანიაშიც. ვიზიტის ფარგლებში დაგეგმილი იყო დონალდ ტრამპის შეხვედრა საქართველოს პრეზიდენტთან და ბიზნეს-სექტორის წარმომადგენლებთან.
შეგახსენებთ, რომ ტრამპის ორგანიზაციასა და "სილქროუდ ჯგუფს" შორის თანამშრომლობის ხელშეკრულება აშშ-ში, საქართველოს პრეზიდენტ მიხეილ სააკაშვილის ვიზიტის ფარგლებში, მარტში გაფორმდა. ქართულ მხარესა და დონალდ ტრამპს შორის ხელი მოეწერა ხელშეკრულებას, რომლის თანახმად Trump Tower საქართველოშიც აშენდება.
გეგმის მიხედვით, ტრამპის ინვესტირებით, თბილისსა და ბათუმში საცხოვრებელი კომპლექსი და სასტუმრო უნდა აშენდეს. მშენებლობაში პირველ ეტაპზე 250 მილიონი ამერიკული დოლარი ჩაიდება, თუმცა ორგანიზაციის ხელმძღვანელობა სამომავლოდ ინვესტიციის გაზრდას გეგმავს. პროექტის დასრულების შემდეგ, სასტუმრო და საცხოვრებელი ბინების გარდა, შენობებში კომერციული ფართები და სამორინეები განთავსედება.
