"ქრისტიან-დემოკრატები" რეგიონებში შეხვედრებს განაგრძობენ. პარტიის ლიდერები დღეს ფოთის კულტურის სახლში მოსახლეობას შეხვდნენ. გიორგი თარგამაძემ და გიორგი ახვლედიანმა სხვადასხვა სოციალური ფენის წარმომადგენლებთან რამდენიმე საათის განმავლობაში ფოთელებისთვის აქტუალურ საკითხებზე ისაუბრეს. შეხვედრას ესწრებოდნენ პენსიონერები, საჯარო და კერძო სექტორებში დასაქმებულები, ვეტერანები, დევნილები, ფოთის პორტის ყოფილი თანამშრომლები, სტუდენტები.
"ყველაზე მნიშვნელოვანი პრობლემა, რაც ფოთში დომინირებს, უმუშევრობაა. ხელისუფლების პიარის მიღმა, რეალობა რადიკალურად განსხვავებულია. ფოთელებს კარგად ახსოვთ პრეზიდენტის დაპირება, რომ მთავრობა ყველა ოჯახიდან მინიმუმ ერთი ადამიანის დასაქმებას უზრუნველყოფდა, ახალი სამუშაო ადგილების შექმნის ნაცვლად კი სულ ცოტა ხნის წინ ფოთის პორტიდან, ყოველგვარი ახსნა-განმარტების გარეშე, 400-მდე ადამიანი გაათავისუფლეს" - განაცხადა გიორგი თარგამაძემ.
მისივე თქმით, გაუსაძლის პირობებში ცხოვრობენ ახალ კორპუსებში ჩასახლებული დევნილები, სადაც არც ბუნებრივი აირია შეყვანილი და ვერც შეშის ღუმელების დადგმა ხერხდება.
"ქრისტიან-დემოკრატები" ფოთელებს სხვადასხვა პრობლემის გადაჭრაში დახმარებას დაპირდნენ და ის საკითხები გააცნეს, რომლებიც პარტიის ინიციატივების შედეგად, მთავრობამ დადებითად გადაწყვიტა.
თარგამაძის განცხადებით, ქდმ-ს ძალისხმევის შედეგად მოხერხდა ქვეყანაში საპენსიო მატება, პენსიონერთა და სკოლამდელი ასაკის ბავშვთა სახელმწიფო დაზღვევით უზრუნველყოფა და ასობით ათასი ადამიანისთვის მნიშვნელოვანი სხვა საკითხების გადაწყვეტა.
