"დემოკრატიული მოძრაობა ერთიანი საქართველოს" მთავარი საბჭო შეშფოთებას გამოთქვამს თბილისის 53 სკოლის ყოფილი მოსწავლის მიხეილ ალექსიძის მიმართ განათლების მიღების უფლების შეზღუდვის გამო. როგორც "დემოკრატიული მოძრაობა" იუწყება, მიხეილ ალექსიძე მიმდინარე წლის 13 ოქტომბერს სათანადო პროცედურების დარღვევით გარიცხეს სკოლიდან.
"საგანგაშოა, რომ მიხეილ ალექსიძეს 13 ოქტომბრის შემდეგ შეეზღუდა განათლების მიღების უფლება, რაც არის საქართველოს კონსტიტუციის 35-ე მუხლის და გაეროს ბავშვთა უფლებების კონვენციის 28-ე მუხლის უხეში დარღვევა. მოსწავლის მშობლის განცხადებით, მას ბავშვის მიღებაზე უარი ექვსი საშუალო სკოლის ხელმძღვანელმა განუცხადა. აღნიშნული ფაქტი კიდევ ერთხელ ადასტურებს, რომ კონტროლირებადი ტელევიზიებით რეკლამირებული განათლების სისტემის ფსევდორეფორმა სხვა არაფერია, თუ არა სისტემის მიზანმიმართული ნგრევა და საზოგადოებისთვის განათლების მიღების შესაძლებლობის მოსპობა, რაც ხშირ შემთხვევაში ადამიანებს ცხოვრებაში ადგილის დამკვიდრების გზას უჭრის. ეს განსაკუთრებით საგანგაშოა მაშინ, როცა საქმე არასრულწლოვანს ეხება, რომლის მომავალიც შესაძლოა ამ ფაქტის გამო მთლიანად შეიცვალოს და დაინგრეს", - აღნიშნულია "დემოკრატიული მოძრაობის" განცხადებაში.
განცხადების თანახმად, "დემოკრატიული მოძრაობა ერთიანი საქართველოს" მთავარი საბჭო მოუწოდებს ბავშვთა უფლებების დამცველ საერთაშორისო ორგანიზაციებს, საქართველოში აკრედიტებულ დიპლომატიური კორპუსის წარმომადგენლებს, დაინტერესდნენ აღნიშნული საკითხით და მოახდინონ ზეწოლა საქართველოს ხელისუფლებაზე, რათა მიხეილ ალექსიძეს აღუდგეს მისი ერთ-ერთი ფუნდამენტური უფლება _ მიიღოს განათლება.