თბილისის მერმა გიგი უგულავამ და საქართველოს განათლებისა და მეცნიერების მინისტრმა დიმიტრი შაშკინმა სანზონაში ის ტერიტორია დაათვალიერეს, სადაც პროფესიული გადამზადების ახალი ცენტრი აშენდება. სპეციალური ტექნიკის გამოყენებით ძველი შენობის სიმბოლურ დემონტაჟს თბილისის მერმა პირადად განახორციელა.
პროფესიულ განათლებაზე მოსახლეობის გაზრდილმა მოთხოვნამ დღის წესრიგში სასწავლებლების რაოდენობის გაზრდა დააყენა. დღეს დავით გურამიშვილის გზატკეცილზე საფუძველი კიდევ ერთი ახალი პროფესიული კოლეჯის მშენებლობას ჩაეყარა.
კოლეჯის მშენებლობა 2012 წლის სექტემბრისთვის დასრულდება და მსურველებს პროფესიული საგანმანათლებლო პროგრამების პირველ 3 საფეხურს შესთავაზებს. კოლეჯი თანამედროვე მატერიალურ-ტექნიკური ბაზითა და შესაბამისი ინვენტარით აღიჭურვება. კეთილმოეწყობა კოლეჯის ეზო და აშენდება სახელოსნოები. კოლეჯი კვალიფიციური კადრებით დაკომპლექტდება, რომელთა შერჩევაც კონკურსის წესით მოხდება.
პროფესიული კოლეჯი შრომის ბაზრის მოთხოვნებს დააკმაყოფილებს და მსურველებს მომსახურების, ტურიზმისა და მშენებლობის სფეროებში არსებულ სპეციალობებს შესთავაზებს. კოლეჯი სახელმწიფოს მიერ პრიორიტეტულად აღიარებულ შემდეგ პროგრამებს განახორციელებს: სასურსათო პროდუქტების ეკოლოგიური კონტროლის სპეციალისტი; კალატოზი; მეფილე-მომპირკეთებელი; მებათქაშე; ელექტრიკოსი; მღებავი; დურგალი; სავალი ნაწილის ტექნიკოსი; ძრავის შემკეთებელი; სამკერვალო ნაწარმის სპეციალისტი; სამაცივრო მოწყობილობების ტექნიკოსი; თექის ხელოსანი; შემდუღებელი; მეავეჯე; მზარეული.
თბილისში ამ ეტაპზე 36 ავტორიზებული პროფესიული საგანმანათლებლო დაწესებულება ფუნქციონირებს.
