დღეს, 00:30 საათზე საკუთარი სახლის სადარბაზოში 5 პირი თავს დაესხა დეპუტატ გიორგი ცაგარეიშვილის შვილს. როგორც "თავისუფალი დემოკრატები" იუწყებიან, 19 წლის ზურაბ ცაგარეიშვილი ტვინის შერყევის დიაგნოზით გადაყვანილია რესპუბლიკურ საავადმყოფოში.
"თავდასხმა ძარცვის მიზნით არ განხორციელებულა, რადგან არ წაუღიათ საფულე და მობილური ტელეფონი. თავისუფალი დემოკრატები მოვითხოვთ უმოკლეს დროში მოხდეს დამნაშავეების დადგენა და დაკავება. პირველ რიგში უნდა მოხდეს კავსაძის ქუჩაზე დამონტაჟებული სათვალთვალო კამერების ფირების ამოღება. იმედს ვიტოვებთ, რომ განსხვავებული აზრის მქონე პოლიტიკოსის ოჯახის წევრზე თავდასხმის ფაქტს ხელისუფლება მთელი სერიოზულობით მოეკიდება, რათა გამოირიცხოს ყველა ეჭვი, რომ ეს თავდასხმა გიორგი ცაგარეიშვილის პოლიტიკურ საქმიანობას და ბოლო დროინდელ აქტიურობას უკავშირდება", - აღნიშნულია "თავისუფალი დემოკრატების" განცხადებაში.