საქართველოსა და ირანს შორის ტურისტული ნაკადი სწრაფად იზრდება. 2011 წლის ათი თვის მონაცემებით, ირანიდან ტურისტების რაოდენობამ 55 ათასი ტურისტი შეადგინა, ამის შესახებ საქართველოს საგანგებო და სრულუფლებიანმა ელჩმა ირანსა და პაკისტანში გიორგი ჯანჯღავამ განაცხადა.
ირანული მედიის ინფორმაციით, 2011 წლის ბოლომდე საქართველოში ირანული ტურისტების რაოდენობა 60 ათას ტურისტამდე გაიზრდება, მიუხედავად იმისა, რომ 2010 წელს საქართველოს 4-ჯერ ნაკლებმა ირანელმა ტურისტმა მოინახულა. 2010 წელს მათმა რაოდენობამ 18 ათასი ტურისტი შეადგინა.
გიორგი ჯანჯღავას განმარტებით, გაიზარდა ასევე ირანში ჩამსვლელი ქართველი ტურისტების რაოდენობაც. ელჩის განმარტებით, ირანში ჩამსვლელი ტურისტების რაოდენობა ბოლო წლებში 2,5-ჯერაა გაზრდილი. ელჩის განმარტებით, ტურისტული ნაკადის ზრდას უვიზო რეჟიმი განაპირობებს, რომელიც 2011 წლის ნოემბერში გაფორმდა. ხელშეკრულების მიხედვით ირანის მოქალაქეს უვიზოდ საქართველოს ტერიტორიაზე შემოსვლა და დარჩენა 45 დღის განმავლობაში შეუძლია. ანალოგიური წესები მოქმედებს ირანში ჩამსვლელი ქართველი ტურისტების მიმართაც. იმავდროულად, თეირანმა ბათუმში უკვე საკონსულოც გახსნა. წელსვე, 11 თვიანი პაუზის შემდეგ, თეირანსა და თბილისს შორის პირდაპირი ავიარეისები აღსდგა.
