საქართველომ საერთაშორისო რეიტინგში - „Paying Taxes 2012", გადასახადების გადახდის სიმარტივის მიხედვით, გასულ წელთან შედარებით მდგომარეობა 22 პოზიციით გაიუმჯობესა და 183 ქვეყანას შორის 39-ე ადგილი დაიკავა.
რეიტინგის მიხედვით, საქართველომ კომპანიებისათვის გადასახადების გადახდები გაამარტივა და ელექტრონული გადახდების სისტემა აამუშავა. 2011 წლის ანალოგიურ მოხსენებაში გადასახადების გადახდის სიმარტივის რეიტინგში საქართველო 61-ე ადგილზე იმყოფებოდა.
საქართველოს გადასახადების გადახდის სიმარტივის კუთხით მსოფლიო 183 ქვეყანას შორის ერთ-ერთ მოწინავე ადგილს იკავებს. 2012 წლის „გადასახადების გადახდის" მოხსენებაში, 2011 წელთან შედარებით, ქვეყანამ მდგომარეობა გაიუმჯობესა შემდეგ კომპონენტში - გადახდები (მდგომარეობა გაუმჯობესდა 56 პოზიციით), რომლითაც საქართველომ მსოფლიო ქვეყნებს შორის მე-4 ადგილი დაიკავა.
გადასახადების გადახდის სიმარტივის 2012 წლის რეიტინგში პირველი ადგილი მალდივებს, ხოლო უკანასკნელი ვენესუელას უკავია.
რეიტინგი „გადასახადების გადახდა 2012" „მსოფლიო ბანკისა" (World Bank) და „საერთა-შორისო საფინანსო კორპორაციის" (IFC) კომპანია „PricewaterhouseCoopers"-თან (PwC) თანამშრომლობით მომზადდა. „გადასახადების გადახდა 2012" რიგით მეშვიდე გამოცემაა. კვლევა დაფუძნებულია მონაცემებზე, რომლე-ბიც შეგროვდა „Doing Business"-ის პროექტთან ერთად.
მოხსენებაში გამოკვლეულია მსოფლიოს 183 ქვეყნის მონაცემები. გადასახადები მოიცავს: მოგების ან კორპორატიულ საშემოსავლო გადასახადებს; სოციალურ შენატანებსა და დამქირავებლის მიერ გადახდილ დაქირავების გადასახადებს; საკუთრების გადასახადს; საკუთრების ტრანსფერის გადასახადს; დივიდენდებს; მოგების გადასახადს; ფინანსური ტრანზაქციების გადასახადს; გზათ სარგებლობის გადასახადსა და სხვა.