"საქსტატსა" და ილიას სახელმწიფო უნივერსიტეტს შორის თანამშრომლობის მემორანდუმი გაფორმდა. მემორანდუმს ხელი სტატისტიკის ეროვნული სამსახურის აღმასრულებელმა დირექტორმა ზაზა ჭელიძემ და ილიას სახელმწიფო უნივერსიტეტის რექტორმა გიგი თევზაძემ მოაწერეს. ამ მემორანდუმით განისაზღვრება "საქსტატსა" და ილიას სახელმწიფო უნივერსიტეტს შორის თანამშრომლობის ძირითადი პრინციპები, რაც სტატისტიკის მწარმოებლებსა და მომხმარებლებს შორის დიალოგის წარმოებას უზრუნველყოფს.
"ილიას უნივერსიტეტის ლექტორატთან და სტუდენტობასთან პირველი შეხვედრა გვაქვს, რათა მათ ჩვენი საქმიანობის ძირითადი მიმართულებები გავაცნოთ, თუ რა მეთოდოლოგიას ვიყენებთ და თუ როგორ მიიღება ის სტატისტიკური ინფორმაცია, რომელსაც თავად აქტიურად იყენებენ.
ჩვენთვის ილიას სახელმწიფო უნივესიტეტთან თანამშრომლობა მნიშვნელოვანია, რათა გვქონდეს დიალოგი ჩვენი სტატისტიკური ინფორმაციის ძირითად მომხმარებლებთან - სტუდენტები წარმოადგენენ ერთ-ერთ ყველაზე აქტიურ მომხმარებლებს. ჩვენ გვექნება ასევე საშუალება, რომ სტუდენტებთან ერთად სხვადასხვა პროექტებზე ერთობლივად ვიმუშაოთ. სტუდენტებისა და ახალკუსდამთავრებულების დაინტერესება მნიშვნელოვანია, რადგანაც ჩვენს სამსახურს აქტიურად ჭირდება გადახალისება", - განაცხადა სტატისტიკის ეროვნული სამსახურის აღმასრულებელმა დირექტორმა ზაზა ჭელიძემ.
ზაზა ჭელიძის განმარტებით, მემორანდუმის ფარგლებში ის ილიას სახელმწიფო უნივერსიტეტში ლექციებსაც წაიკითხავს და ამით, ახალგაზრდა თაობის განათლების ამაღლებასთან ერთად, მათ დაინტერესებასაც შეეცდება.
მემორანდუმის საფუძველზე "საქსტატი" ილიას უნივერსიტეტს უზრუნველყოფს პერიოდული საინფორმაციო პაკეტებით, შეიქმნება ერთობლივი სამუშაო ჯგუფები, მოეწყობა პერიოდული შეხვედრები სტუდენტებთან და უნივერსიტეტის პროფესორ-მასწავლებლებთან.
აღსანიშნავია, რომ "საქსტატს" ანალოგიური მემორანდუმი უკვე გაფორმებული აქვს თსუ-სთან და უახლოეს პერიოდში შესაბამისი ხელშეკრულების გაფორმებას სხვა უმაღლეს სასწავლებლებთანაც იგეგმება.