საქართველოს ახალგაზრდა იურისტთა ასოციაციამ, "სამართლიანი არჩევნებისა და დემოკრატიის საერთაშორისო საზოგადოებამ" (ISFED) და "საერთაშორისო გამჭვირვალობა - საქართველომ" დღეს საარჩევნო კოდექსის პროექტზე ვენეციის კომისიისა და OSCE/ODIHR-ის პირველადი დასკვნის პროექტზე საჯარო დისკუსია გამართეს.
ორგანიზაციების შეფასებით, ვენეციის კომისიისა და OSCE/ODIHR-ის პირველადი დასკვნის პროექტი გარკვეულწილად ეხმიანება ყველა იმ პრობლემას, რომელიც მნიშვნელოვანია საარჩევნო გარემოს გაუმჯობესებისთვის. საქართველოს პარლამენტის მიერ საარჩევნო კანონმდებლობაში გათვალისწინებული შენიშვნები კი არასაკმარისია კონკურენტუნარიანი საარჩევნო გარემოს უზრუნველსაყოფად და დამატებით დახვეწას საჭიროებს.
შეხვედრაში მონაწილეობა მიიღეს ადგილობრივი და საერთაშორისო ორგანიზაციების, მედიასაშუალებებისა და პოლიტიკური პარტიების წარმომადგენლებმა. ღონისძიება საარჩევნო სისტემების საერთაშორისო ფონდის (IFES) საქართველოს წარმომადგენლობის და აშშ-ის საერთაშორისო განვითარების სააგენტოს (USAID) მხარდაჭერით გაიმართა.
ვენეციის კომისიისა და OSCE/ODIHR-ის პირველადი დასკვნის პროექტის განხილვის პარალელურად, შეხვედრაზე საუბარი იყო "საქართველოს საარჩევნო კოდექსის" პროექტის ტექსტში საქართველოს პარლამენტის იურიდიული კომიტეტის მიერ მომზადებულ საკანონმდებლო ცვლილებებზე. ეს ცვლილებები ვენეციის კომისიის, OSCE/ODIHR-ისა და ადგილობრივი არასამთავრობო ორგანიზაციების შენიშვნების გათვალისწინებით მომზადდა.
