10 დეკემბერს, 13:00 საათზე, კულტურის ცენტრ "მუზაში", აშშ-ის ელჩი საქართველოში ჯონ ბასი და საქართველოს პირველი ლედი სანდრა რულოვსი შიდსის მსოფლიო დღეს აღნიშნავენ. ღონისძიებას დაესწრებიან განათლების მინისტრი დიმიტრი შაშკინი, ჯანდაცვის მინისტრი ანდრია ურუშაძე, სპორტისა და ახალგაზრდობის მინისტრი ლადო ვარძელაშვილი და პარლამენტის ვიცე-სპიკერი გიგი წერეთელი. ღონისძიების მიზანია, აამაღლოს ახალგაზრდების ცოდნა აივ-ინფექციასა და შიდსზე. გაიმართება თემატური გამოფენა და კონსურსი საუკეთესო სლოგანის გამოსავლენად.
უკანასკნელი ათი წლის განმავლობაში აშშ-ის მთავრობამ საქართველოში აივ-ინფექციისა და შიდსის გავრცელების პრევენციისთვის 7 მილიონ დოლარზე მეტი გაიღო. აივ-ინფექციისა და შიდსის პრევენციის მიმდინარე პროგრამის ფარგლებში მაღალი რისკის ჯგუფებში ტარდება პრევენციული ღონისძიებები ნებაყოფლობითი ტესტირებისა და კონსულტაციების საშუალებით. ხუთწლიანი პროგრამის ბიუჯეტი 6 მილიონი დოლარია. პროგრამას ახორციელებს აშშ-ის საერთაშორისო განვითარების სააგენტო (USAID). პროგრამის დახმარებით, შემუშავდა ჯანსაღი ცხოვრების წესის სახელმძღვანელო, რომელიც ამა წლის დასაწყისში განათლების სამინისტრომ საშუალო სკოლებში შეიტანა.
პრევენციული ღონისძიებებისა და საშუალო სკოლებში ჯანსაღი ცხოვრების წესების შესწავლით, აშშ-ის მთავრობა ცდილობს, აამაღლოს ქართველი ახალგაზრდების ცოდნა აივ-ინფექციისა და შიდსის შესახებ, შეამციროს სტიგმა და ხელი შეუწყოს ამ დააავადების თავიდან აცილებას საქართველოში.