გურჯაანის რაიონის სოფელ კალაურში წმინდა ნინოს ეკლესიის სარეაბილიტაციო სამუშაოები დასრულდა. ეკლესია გურჯაანი - ველისციხის ეპარქიის მთავარეპისკოპოსმა მეუფე ექვთიმემ აკურთხა.
წმინდა ნინოს სახელობის ტაძარი XVII - XVIII საუკუნეებშია აშენებული. ეკლესია დიდი ხნის განმავლობაში უმოქმედო იყო. საბჭოთა მმართველობის პერიოდში მეურნეობის საწყობად გამოიყენებოდა.
ეკლესიის სარეაბილიტაციო სამუშაოები სოფლის მოსახლეობის შემოწირულობით ხუთი წლის წინ დაიწყო. 2010 წელს კი, სარეაბილიტაციო სამუშაოების დასამთავრებლად თანხა საქართველოს კულტურული მემკვიდრეობის დაცვის ეროვნულმა სააგენტომ გამოყო.
როგორც კახეთის საინფორმაციო ცენტრს გურჯაანის მუნიციპალიტეტის გამგეობის კულტურის სამსახურის სპეციალისტმა თამაზ მარკოზაშვილმა განუცხადა, კალაურის წმინდა ნინოს ეკლესია ერთადერთია გურჯაანის რაიონში, რომელიც წმინდა ნინოს სახელზეა აშენებული. მისივე თქმით, ტაძარი გადაიხურა კრამიტით, მთლიანად შეილესა ინტერიერი, გაკეთდა შიდა განათება, მოხდა გარე ფასადების რეაბილიტაცია და ძეგლის გარშემო მოეწყო სარინელი.
ეკლესია ლამაზი არქიტექტურული ფორმებით გამოირჩევა.
