ხვალ, 8 დეკემბერს, 12:00 საათზე, თბილისი მერიოტში საქართველოს განვითარების კვლევითი ინსტიტუტი აწყობს „სოციალური კვლევისა და ანალიზის" ინსტიტუტის მიერ ჩატარებული სოციოლოგიური კვლევის შედეგების პრეზენტაციას.
როგორც "ჯი-ეიჩ-ენს" საქართველოს განვითარების კვლევითი ინსტიტუტიდან აცნობეს, პრეზენტაციისას წარმოდგენილ იქნება პოლიტიკურ პარტიათა რეიტინგები და ქვეყანაში მიმდინარე პროცესების მიმართ ამომრჩეველთა დამოკიდებულება. კვლევისას პასუხები გაეცა მათ შორის ისეთ შეკითხვებს, როგორებიცაა: ხვალ რომ საპარლამენტო არჩევნები გაიმართოს, რომელ პოლიტიკურ ძალას დაუჭერდით მხარს? და ვის ისურვებდით საქართველოს პრემიერ-მინისტრის პოსტზე 2013 წლიდან?
ღონისძიებას დაესწრებიან პოლიტიკური პარტიების, დიპლომატიური კორპუსის, საერთაშორისო ორგანიზაციების, არასამთავრობო ორგანიზაციების და მედიის წარმომადგენლები.
„სოციალური კვლევისა და ანალიზის" ინსტიტუტმა საქართველოს განვითარების კვლევითი ინსტიტუტის დაკვეთით 2011 წლის 11-22 ნოემბერს ჩაატარა ეროვნული შერჩევის სოციოლოგიური გამოკითხვა, რომელიც ეხებოდა საარჩევნო ასაკის (18 წლის და მეტი) მოსახლეობის პოლიტიკური განწყობებისა და ქვეყანაში მიმდინარე პროცესების მიმართ ამომრჩეველთა დამოკიდებულების შესწავლას. სულ გამოიკითხა დაახლოებით 3000 რესპონდენტი საქართველოს 11 რეგიონში, თბილისის ჩათვლით. გამოყენებულ იქნა მრავალსაფეხურიანი კლასტერული შერჩევის მოდელი. რესპონდენტთა შერჩევა მოხდა ოჯახებში, შემთხვევითი შერჩევის პრინციპის დაცვით. თითოეულ რეგიონში შერჩევის მოცულობა გადანაწილდა ისე, რომ შენარჩუნებულიყო შედეგების დასაშვები ცდომილება და მონაცემები რეპრეზენტატული ყოფილიყო თითოეული რეგიონისათვის. მთელი ქვეყნისთვის შერჩევის ცდომილება არ აჭარბებს 1.8%-ს 95%-იანი საიმედოობისათვის. გამოკითხვა ჩატარდა პირისპირ ინტერვიუს მეთოდით. კვლევამ უზრუნველყო რესპონდენტთა ანონიმურობის მაქსიმალური დაცვა. ინსტიტუტის ხელმძღვანელია პროფესორი იაგო კაჭკაჭიშვილი.
საქართველოს განვითარების კვლევითი ინსტიტუტი (GDRI) 2011 წელს დაფუძნდა. ორგანიზაციის ხელმძღვანელია გია ხუხაშვილი.
