საქართველოში აკრედიტებული დიპლომატიური კორპუსი და საერთაშორისო ორგანიზაციის წარმომადგენლები ამომრჩეველთა სიების დაზუსტების მიზნით შექმნილი სპეციალური კომისიის მუშაობას გაეცნენ.
პარლამენტის თავმჯდომარე დავით ბაქრაძემ კომისიის შექმნისა და მუშაობის სპეციფიკა დიპლომატებსა და უცხოელ ექსპერტებს გააცნო. მისი განცხადებით, სპეციალური კომისია, რომელიც პოლიტიკური პარტიების შეთანხმების საფუძველზე შეიქმნა, საწყის ეტაპზევე აქტიურად თანამშრომლობს საერთაშორისო თანამეგობრობის და არასამთავრობო სექტორის წარმომადგენლებთან.
"გამართული საარჩევნო სიები არის ერთ-ერთი მნიშვნელოვანი ელემენტი თავისუფალი და კარგად ორგანიზებული არჩევნების ჩატარებისთვის. საქართველოში ერთხელ და სამუდამოდ უნდა დასრულდეს საუბარი საარჩევნო სიებთან დაკავშირებით და ამისთვის შეიქმნა სპეციალური კომისია, რომელსაც აქვს ყველა რესურსი და უფლებამოსილება საარჩევნო სიების სრულყოფის მიზნით", - აღნიშნა ბაქრაძემ.
დიპლომატებთან და საერთაშორისო ორგანიზაციის წარმომადგენლებთან შეხვედრას პარლამენტის წევრი აკაკი მინაშვილი და სპეციალური კომისიის ხელმძღვანელი მამუკა კაციტაძეც დაესწრნენ.
