თბილისის მერი განაგრძობს რაიონულ მუნიციპალიტეტებში თბილისელების მიღებას. გიგი უგულავა დღეს ლილოს მუნიციპალიტეტში ადგილობრივ მოსახლეობას შეხვდა და მათ პრობლემებს გაეცნო.
მოსახლეობასთან შეხვედრის შემდეგ, თბილისის მერმა განაცხადა, რომ მნიშვნელოვანია რაიონული მუნიციპალიტეტების არსებობა ქალაქის ყველა უბანში, რაც მოსახლეობას შესაძლებლობას აძლევს სახლთან ახლოს მდებარე ადგილობრივი თვითმმართველობის ორგანოს მიმართოს, ყოველივე ეს კი ხელისუფლებისა და მოსახლეობის მჭიდრო კავშირს უზრუნველყოფს. მუნიციპალიტეტების არსებობა განსაკუთრებით მნიშვნელოვანი თბილისთან შემოერთებულ ტერიტორიებზეა, რათა ადგილობრივმა მოსახლეობამ მარტივად შეძლოს ხელისუფლებასთან კომუნიკაცია.
ქალაქის ყველა უბანში არსებულ 30 მუნიციპალიტეტში, ყოველდღიურად ათიათასობით თბილისელი მათთვის საინტერესო სოციალურ, ინფრასტრუქტურულ, საბინაო ამხანოგობებთან, მათ შორის ე.წ. „ატსტუპნიკების" თემასთან დაკავშირებულ, აქტუალურ საკითხზე იღებს კონსულტაციასა და მომსახურებას. თითოეულ მუნიციპალიტეტში პროგრამა „თბილისელების ადვოკატი" ფუნქციონირებს, რომლის დახმარებით მოქალაქეები უძრავი ქონების ლეგალიზაციის, ბინების პრივატიზაციის, საკუთრების საჯარო რეესტრში დარეგისტრირებისა და ენერგო კომპანიებთან არსებულ დავებსა და სხვა სამართლებრივ საკითხებზე, უფასო მომსახურებით სარგებლობენ. რაიონის სტრუქტურულ ერთეულში ასევე ფუნქციონირებს დასაქმებისთვის აუცილებელი უნარ¬-ჩვევების ინგლისური ენისა და კომპიუტერის შემსწავლელი უფასო კურსები და მიმდინარეობს დასაქმების მსურველთა ბაზაში დარეგისტრირება.
