დღეს, 7 დეკემბერს, 15:00 საათზე, გაეროს სახლში გაიმართება ადამიანის უფლებების თემაზე სტუდენტების მიერ შექმნილი საუკეთესო 1-3 წუთიანი ფილმების გამოსავლენად გამართულ კონკურსში გამარჯვებულთა დაჯილდოება.
კონკურსი ორგანიზებულია საქართველოში გაეროს წარმომადგენლობის მიერ შოთა რუსთაველის თეატრისა და კინოს სახელმწიფო უნივერსიტეტისა და გაეროს ადამიანის უფლებათა უმაღლესი კომისარიატის მხარდაჭერით.
კონკურსის მიზანი იყო ადამიანის უფლებებისა და ადამიანის უფლებათა საყოველთაო დეკლარაციის 30 მუხლის შესახებ ახალგაზრდების ცოდნის ამაღლება და მათთვის ამ საკითხების კინემატოგრაფიულად ასახვის შესაძლებლობის მიცემა.
კონკურსში გამარჯვებულებს დააჯილდოებს გაეროს მუდმივი კოორდინატორი საქართველოში ბატონი ჯეიმი მაკგოლდრიკი.
