საჯარო რეესტრის ეროვნულმა სააგენტომ რეგისტრაციაში გაატარა არასამთავრობო ორგანიზაცია" ქართულ-აფხაზური და ქართულ-ოსური სახლი", რომლის დამფუძნებელი და თავმჯდომარეა პოლიტიკოსი და მეცნიერი, პროფესორი ნესტან კირთაძე.
როგორც ნესტან კირთაძემ "ჯი-ეიჩ-ენს" განუცხადა, 2008 წლის აგვისტოს ომის შემდგომ საქართველოში ეს არის პირველი სამშვიდობო ინიციატივა და სამშვიდობო ინსტიტუცია, რომელიც იწყებს პირდაპირ, ორმხრივ დიალოგს ოსებთან და აფხაზებთან ნდობის, ორმხრივი და მრავალმხრივი ურთიერთობის აღსადგენად.
"ეს იქნება მშვიდობის სახლი, რომელიც ხელს უწვდის აფხაზებსა და ოსებს მშვიდობიანი თანაარსებობის, თანაცხოვრებისთვის საფუძვლების მოსამზადებლად და პირველი ნაბიჯების გადასადგმელად. ეს იქნება სამშვიდობო ინსტიტუცია და კერა ორმხრივი და მრავალმხრივი დაილოგისთვის, ადამიანურ დონეზე ჰუმანიტარული ურთიერთობისთვის, ტრადიციებისა და კულტურული ურთიერთობების განახლებისთვის, პრობლემების განსჯისა და მათი ერთობლივად გადაწყვეტისთვის. ჩვენი სამშვიდობო ურთიერთობები გარდაუვალი რეალობაა. ჩვენ ერთად გადავდგამთ პირველ ნაბიჯებს ამ რეალობის შესაქმნელად", - განუცხადა "ჯი-ეიჩ-ენს" კირთაძემ.
დეტალურ ინფორმაციას "ქართულ-აფხაზური და ქართულ-ოსური სახლის", როგორც სამშვიდობო ინსტიტუციის, მისი პარტნიორებისა და სამომავლო გეგმების შესახებ კირთაძე უახლოეს დღეებში საგანგებოდ გამართულ პრესკონფერენციაზე ისაუბრებს.
