საქართველოს საავტორო უფლებათა ასოციაციასა და თბილისის ოპერისა და ბალეტის აკადემიურ თეატრს შორის სალიცენზიო შეთანხმება გაფორმდა. როგორც "ჯი-ეიჩ-ენს" ოპერის ხელმძღვანელმა დავით საყვარელიძემ განუცხადა, კონტრაქრი თეატრსა და ავტორებს შორის ურთიერთობებს დაალაგებს.
"როცა საერთაშორისო ასპარეზზე გადის ქვეყანა, თეატრებში უცხოელი არტისტები ჩამოდიან, მაშინ ყველაფრის დალაგებაა საჭირო. ეს ასოციაცია პირატულ ნაწარმს უარყოფს. სხვის პროუქციას ჩვენ ვერ გამოვიყენებთ და ასევე, ჩვენსას ვერავინ. ავტორს უამრავი მუსიკალური ნაწარმოები აქვს, რომელმაც ამით უნდა მიიღოს შემოსავალი და ამას გაკონტროლება სჭირდება. როცა რეჟისორი დადგამს ან მხატვარი შექმნის რამეს, ჩვენს თეატრში მას შემოსავალი ექნება", - განაცხადა საყვარელიძემ.
ლიცენზიის საფუძველზე, თეატრში გამართული საოპერო და საბალეტო წარმოდგენები საავტორო უფლებებით იქნება დაცული, თეატრის მიერ სპექტაკლების რეჟისორების, კომპოზიტორების, ლიბრეტოების ავტორების, კოსტიუმების მხატვრებისა და სხვა ავტორებისთვის ჰონორარები იქნება გადახდილი, რაც მათ ასოციაციის მეშვეობით გაუნაწილდებათ.
ლიცენზიას ხელი საქართველოს საავტორო უფლებათა ასოციაციის თავმჯდომარე გიგა კობალაძემ და თბილისის ოპერისა და ბალეტის აკადემიური თეატრის მმართველი დავით საყვარელიძემ მოაწერეს.
