ჰაერში მავნე ნივთიერებების გაფრქვევისთვის დაჯარიმებულ პირებს გადაუხდელი ჯარიმებისგან გაათავისუფლებენ. პარლამენტმა "ზოგიერთ ადმინისტრაციული სახდელისგან გათავისუფლების შესახებ" კანონი პარლამენტმა დღეს მესამე მოსმენით დაამტკიცა.
პარლამენტის მიერ მიღებული გადაწყვეტილებით, ჯარიმებისგან გათავისუფლდებიან მიწის ნაკვეთის არამიზნობრივი გამოყენებისთვის დაჯარიმებული პირები, თუ მათ ჯარიმა მიმდინარე წლის 1-ელ ნოემბრამდე დაეკისრათ და ჯერ არ გადაუხდიათ.
ასევე, გადაუხდელი ჯარიმებისგან გათავისუფლდებიან პირები, რომელთაც ჯარიმა ატმოსფერულ ჰაერში მავნე ნივთიერებათა გაფრქვევისთვის, ატმოსფერული ჰაერის მავნე ნივთიერებებით დაბინძურებისთვის, ნებისმიერი ტიპის ნარჩენების ღია წესით ან არადანიშნულების საწვავ დანადგარებში დაწვისთვის და ატმოსფერულ ჰაერში მავნე ნივთიერებათა გაფრქვევების აღრიცხვის მონაცემების, დადგენილი ფორმითა და დადგენილ ვადებში წარმოუდგენლობისთვის დაჯარიმდნენ.
