"დემოკრატიული მოძრაობა" აცხადებს, რომ რეფერენდუმით მიღებული ცვლილების პარლამენტის გადაწყვეტილებით შეცვლა დაუშვებელია და მხოლოდ რეფერენდუმის გზით არის შესაძლებელი. როგორც "ჯი-ეიჩ-ენს" "დემოკრატიული მოძრაობიდან" აცნობეს, 6 დეკემბერს საქართველოს პარლამენტში გამართული დებატები და ურთიერთბრალდებები საპარლამენტო ოპოზიციასა და ხელისუფლებას შორის ამ საკითხთან დაკავშირებით ისევ ხალხის მიერ მიღებული გადაწყვეტილების იგნორირება და კონსტიტუციისა და არეფერენდუმის შესახებ კანონის უგულვებელყოფაა.
" 27 ივნისს "პრაიმ ტაიმის" პრესკლუბში ჟურნალისტის მიერ დასმულ შეკითხვაზე, ე.წ. "რვიანისა" და ხელისუფლების მოლაპარაკებების შესახებ, საარჩევნო გარემოს გაუმჯობესებასთან დაკავშირებით, სადაც საუბარი დეპუტატების რაოდენობის გაზრდას შეეხებოდა, "დემოკრატიული მოძრაობის" თავმჯდომარემ ნინო ბურჯანაძემ უპასუხა: "გაუგებარია, დღეს რატომ ეთანხმებიან "ახალი მემარჯვენეები" პარლამენტში დეპუტატების რაოდენობის ზრდას ყოველგვარი რეფერენდუმის გარეშე, როდესაც თავის დროზე ისინი ამის გამო პარლამენტის თავმჯდომარის კაბინეტთან შიმშილობდნენ?! რეფერენდუმით მიღებული ცვლილების რეფერენდუმის გარეშე შეცვლა საქართველოს კონსტიტუციას და რეფერენდუმის შესახებ კანონს ეწინააღმდეგება და დაუშვებელია", - აღნიშნულია "დემოკრატიული მოძრაობის" განცხადებაში.
განცხადების თანახმად, ხელისუფლება "რვიანთან" მოლაპარაკებების დროს აცხადებდა, რომ პარლამენტართა რაოდენობის გაზრდის საკითხი ოპოზიციის ინტერესების გათვალისწინებითა და მოთხოვნით განიხილებოდა, რაც პრეზიდენტმაც დაადასტურა ერთ-ერთ ინტერვიუში.
