ბიძინა ივანიშვილის ადვოკატები მოითხოვენ ბათილად ცნობას საქართველოს პრეზიდენტის მიერ გამოცემულ 2011 წლის 11 ოქტომბრის აქტის, რომლის მიხედვითაც ბიზნესმენსა და მის მეუღლეს, ეკატერინე ხვედელიძეს საქართველოს მოქალაქეობა შეუწყდა. როგორც დღეს, "თბილისი მარიოტში" გამართულ პრესკონფერენციაზე ივანიშვილისა და მისი მეუღლის ერთ-ერთმა ადვოკატმა შალვა თადუმაძემ განაცხადა, პრეზიდენტს არ აქვს უფლება მოქალაქეობა შეუწყვიტოს საგამონაკლისო წესით მინიჭებულ საქართველოს მოქალაქეს.
"ერთადერთი მოთხოვნა, რაც სარჩელში ჩვენ გვაქვს დაფიქსირებული, ეს არის აქტის ბათილად ცნობა. შიდა კანონმდებლობით აქტის ბათილად ცნობის ორი პირობა არსებობს: ერთი როდესაც ის გამოსცა არაუფლებამოსილმა პირმა, ამ შემთხვევაში საქართველოს პრეზიდენტმა. ადმინისტრაციულ სამართალში მოქმედებს პრინციპი, რომ ის რაც არ არის დაშვებული, ის აკრძალულია. შესაბამისად, არ არსებობს არც კონსტიტუციით, არც კანონით და არც კანონქვემდებარე ნორმატიული აქტებით გაწერილი პროცედურა და უფლებამოსილება არ აქვს პრეზიდენტს მინიჭებული იმისთვის, რომ საგამონაკლისო წესით მინიჭებულ საქართველოს მოქალაქეს, რაიმე ფორმით შეუწყვიტოს საქართველოს მოქალაქეობა. მას არ ქონდა ამის უფლებამოსილება და აქტი გამოცემულია არა უფლებამოსილი პირის მიერ", - განაცხადა თადუმაძემ.
მისი თქმით, ზოგადი ადმინისტრაციული კოდექსი ცალსახად განმარტავს, რომ გადაწყვეტილების მიმღები პირი უნდა იყოს მიუკერძოებელი.
"მაშინ, როდესაც პრეზიდენტი და მისი ადმინისტრაცია სასამართლოზე აფიქსირებს, რომ გადაწყვეტილების მიღების ერთადერთი მოტივი იყო ის, რომ ბიძინა ივანიშვილმა გააკეთა 2011 წლის 7 ოქტომბერს განცხადება და სწორედ ამიტომ დავიწყეთ ადმინისტრაციული საქმის წარმოებაო, ეს უკვე აფიქსირებს, რომ ეს არის მიკერძოებული საქმის წარმოება, რადგან პრეზიდენტს გააჩნდა როგორც პირადი ინტერესი, ისე პოლიტიკური გუნდის ინტერესი და შესაბამისად მან უფლებამოსილების გარეშე მიიღო აქტი, რომელიც სამართლის მიხედვით უპირობოდ ბათილი აქტია. რაც შეეხება პროცედურას. პროცებთან დაკავშირებით ზოგადი ადმინისტრაციული კოდექსი ამბობს, რომ ნებისმიერი აქტი, რომელიც გამოცემულია ამ კანონით დადგენილი პროცედურების დარღვევით ბათილია. ჩვენ გვაქვს მეორე პირობაც. საჯარო განცხადებაში, სადაც ბიძინა ივანიშვილი საუბრობს თავის მოქალაქეობრივ საკითხზე, ის აცხადებს, რომ მას აქვს რუსეთის ფედერაციის, საფრანგეთის რესპუბლიკის მოქალაქეობა და საქართველოს მოქალაქეობა და იგი მზად არის დათმოს ორი ქვეყნის მოქალაქეობა და შეინარჩუნოს მხოლოდ და მხოლოდ საქართველოს მოქალაქეობა. თუ საჯარო განცხადებას, როგორც ადმინისტრაციული წარმოების დაწყების საფუძვლად მიიჩნევს საქართველოს პრეზიდენტი, შესაბამისად ამ საჯარო განცხადებაში დაფიქსირებულია მხარის ნება, რომ იგი თანახმაა მხოლოდ და მხოლოდ ჰქონდეს საქართველოს მოქალაქეობა. თუმცა, პრეზიდენტმა პროცედურა აბსოლუტურად დაარღვია. არც კი შეუტყობინებია ივანიშვილისთვის, რომ მის მიმართ დაიწყო ადმინისტრაციული საქმის წარმოება, რისი ვალდებულებაც საქართველოს პრეზიდენტს ჰქონდა. პრეზიდენტს არ მოუსმენია პოზიცია თუ რას აპირებს ივანიშვილი ოფიციალურად ადმინისტრაციული საქმის წარმოების ფარგლებში მოქალაქეობასთან დაკავშირებით და ძალიან სწრაფი ტემპით მიიღო გადაწყვეტილება ბიძინა ივანიშვილსა და მის მეუღლეს შეუწყვიტოს საქართველოს მოქალაქეობა", - განაცხადა თადუმაძემ.
ივანიშვილის კიდევ ერთ ადვოკატ, ეკა ბესელიას განცხადებით, ამ გადაწყვეტილებით, მიხეილ სააკაშვილმა გადაწყვიტა საქართველოს მოქალაქეობის ჩამორთმევით, ბიძინა ივანიშვილი ჩამოეშორებინათ პოლიტიკური პროცესისთვის, არ მიეღო არჩევნებში მონაწილეობა, არ შეექმნა პოლიტიკური პარტია და ა.შ.
"ეს არღვევს პოლიტიკურ და სამოქალაქო უფლებებს, როგორც ბიძინა ივანიშვილის, ასევე მისი მეუღლის შემთხვევაში. ჩვენი ამოცანა არის საზოგადოებას, ყველას ვისაც აქვს ამის სურვილი, როგორც ქვეყნის შიგფნით ასევე ქვეყნის გარეთაც, სწორად გავაგებინოთ ის არგუმენტები და ის ძირითადი გარემოებები, რომელზე დაყრდნობითაც ძალიან კვალიფიციური იურისტები ამტკიცებენ, რომ პრეზიდენტის მიერ გამოცემული 11 ოქტომბრის აქტი ბიძინა ივანიშვილისთვის და მისი მეუღლისთვის მოქალაქეობის ჩამორთმევის თაობაზე, არის უკანონო. სწორედ ამას ვითხოვთ ჩვენ სასამართლოში შეტანილი სარჩელით, რომლის განხილვა დაიწყო გუშინ. გუშინ მოსამზადებელი სხდომა ჩატარდა, მთავარი სხდომა კი არის დანიშნული 8 დეკემბერს. სწორედ ეს არის ამოცანა, კარგად გაიგოს საზოგადოებამ, რომ როდესაც იურისტები საუბრობენ მიხეილ სააკაშვილის მიერ ხელმოწერილი აქტის ბათილობის აუცილებლობის თაობაზე, ანუ მისი უკანონოდ გამოცხადების თაობაზე, ეს ახირება კი არ არის, ეს არის კანონის და სამართლის მოთხოვნა. ამ აქტის ამოცანა იყო პოლიტიკური მოწინააღმდეგის, პოლიტიკური ოპონენტის ჩამოშორება პოლიტიკური ველიდან", - აღნიშნა ბესელიამ.
