თბილისის მერი გიგი უგულავა აგრძელებს სხვადასხვა პროფესიის ადამიანებთან ერთად მუშაობას და მათი გამოცდილების გაზიარებას.
დღევანდელი სამუშაო დღე გიგი უგულავამ გლდანში მშენებარე სარკინიგზო გვირაბში მუშაობით დაიწყო. თბილისის მერმა აღნიშნა, რომ მისთვის მნიშვნელოვანია სხვადასხვა სამუშაოს შესრულებისას მიღებული გამოცდილება და იქ დასაქმებულთა მოსაზრებების გაზიარება, რადგან მისი მთავარი პრიორიტეტი სამუშაო ადგილების შექმნაა. შესაბამისად მისი ყველა ქმედება და აქტივობა დასაქმებაზეა ორიენტირებული.
გლდანის ტერიტორიაზე მდებარე 430 მეტრიანი სარკინიგზო გვირაბი ერთ-ერთია იმ ხუთი გვირაბიდან, რომელიც შემოვლით სარკინიგზო გზაზე კეთდება. გვირაბების გათხრა ერთდროულად, 2010 წლის ზაფხულში დაიწყო და რამოდენიმე თვეში დასრულდება. ბეტონის გვირაბების მშენებლობა საერთაშორისო ტანდარტების სრული დაცვით მიმდინარეობს.
შემოვლითი რკინიგზის მშენებლობის ფარგლებში ასევე აქტიურად მიმდინარეობს 300 მეტრიანი საყრდენი კედლისა და 14 კილომეტრზე გადაჭიმული მიწის ვაკისის მშენებლობა.
შემოვლითი რკინიგზის მშენებლობას საერთაშორისო ტენდერში გამარჯვებული ქართულ-ჩინური კომპანია ახორციელებს. კომპანია სამუშაოების ფარგლებში, მოწვეულ უცხოელ სპეციალისტებთან ერთად ადგილობრივ კადრებსაც ასაქმებს. სულ მშენებლობაზე 4 000 თბილისელი დასაქმდება.
ახალი სარკინიგზო მაგისტრალი თბილისის ზღვის გავლით გავა ქალაქიდან. პროექტის განხორციელებით გადაიჭრება სატრანსპორტო გადაზიდვებთან დაკავშირებული ეკოლოგიური პრობლემები და თავიდან ავიცილებთ ქალაქის ორ ნაწილად ხელოვნურ გაყოფას, რაც ქალაქის შუაში გამავალი რკინიგზის ხაზით იყო გამოწვეული. თბილისის ცენტრალური ნაწილი ტრანსპორტისგანაც განიტვირთება. ქალაქში გაჩნდება ახალი მრავალფუნქციური ცენტრი, რაც სამუშაო ადგილების შექმნას შეუწყობს ხელს.
ახალი რკინიგზაექსპლუატაციაში 2013 წელს შევა.
