სრულიად საქართველოს კათოლიკოს-პატრიარქმა ილია მეორემ მრევლს ყოვლადწმინდა ღვთისმშობლის ტაძრად მიყვანების დღესასწაული მიულოცა. როგორც პატრიარქმა დღეს, საკვირაო ქადაგებისას ბრძანა, ღვთისმშობელმა საღმრთო წერილი და ხელსაქმე სწორედ ტაძარში შეისწავლა.
" ტაძრის მადლი მას ცვლიდა და ამაღლებდა. ტაძრის მნიშვნელობა ძალიან დიდია. ეს არის კარიბჭე სასუფევლისა. როცა სამების ტაძრის მშენებლობას ვიწყებდით, მხოლოდ საძირკველი იყო ნაკურთხი და უკვე ისეთი მადლი მოეფინა აქაურობას, სახლებში წასვლა აღარ გვინდოდა. ეს იმას ნიშნავს, რომ ტაძარში არის განსაკუთრებული მადლი, რომელიც ცვლის ადამიანს. დღეს ძალიან რთული პერიოდია, დრო, როდესაც სულ სხვანაირად უყურებენ სულიერ ფასეულობას, დრო, როცა ცოდვა ცოდვად აღარ მიაჩნიათ და ადამიანი ადამიანისთვის მგელია. იმისთვის, რომ მაცხოვრის მარჯვენა მხარეს იყოს ჩვენი ადგილი, აუცილებელია რწმენა, მტკიცე სარწმუნოება", - განაცხადა პატრიარქმა და დასძინა, რომ რწმენას ისევე უნდა გავუფრთხილდეთ, როგორც თვალის ჩინს.
პატრიარქმა დღეს მშობლების პატივისცემის აუცილებლობაზეც ისაუბრა და აღნიშნა, რომ მშობლები დღეს ცდილობენ, მრავალსახოვანი განათლება მისცენ შვილებს და სულიერი განათლება ავიწყდებათ.
"ამიტომ ისინი იზრდებიან არა ისეთები, როგორსაც ველოდით, არამედ - ეგოისტები, რომლებიც ტოვებენ თავიანთ მშობლებს. მშობელი, რომელიც მთელი ცხოვრება შვილის აღზრდაზე ზრუნავს, ძნელად წარმოიდგენს, რომ შვილი მას მოხუცთა თავშესაფარში წაიყვანს. მაგრამ მათ უნდა იცოდნენ, რომ როგორც თავად მოექცევიან თავიანთ მშობლებს, ისე თავიანთი შვილები მოექცევიან მათ. ადამიანი რომ იყოს ბედნიერი, ამისი პასუხი გვაქვს ჩვენ - პატივი ეც მამასა შენსა და დედასა შენსა, რათა კეთილი გეყოს შენ. ეს უნდა დავიმახსოვროთ და ყოველდღე უნდა სთხოვოთ დალოცვა თქვენს მშობლებს",- განაცხადა პატრიარქმა.
