საქართველოს პრეზიდენტმა მიხეილ სააკაშვილმა ზუგდიდში ბოტანიკური ბაღისა და დადიანების სასახლის რეაბილიტაციის პროექტი გახსნა.
მისი თქმით, სარეაბილიტაციო სამუშაოები ზუგდიდის სამეგრელოს მთავარ ცენტრად გადაქცევას ემსახურება.
"ჩვენ ვიწყებთ ზუგდიდის მასშტაბურ რეკონსტრუქციას. აქამდე ყველანი კონცენტრირებულები ვიყავით ინფრასტრუქტურაზე, გზებზე, წყალკანალიზაციის სისტემაზე, მაგრამ ჩვენ არასოდეს გვავიწყდება, რომ სამეგრელოს მთავარი ცენტრი, გული, მთავარი ადგილი და ყველაზე მეტი ხალხი ზუგდიდშია. ამიტომ, ჩვენ ვიწყებთ ძალიან დიდი მოედნის კეთებას, თავისი ინფრასტრუქტურით, კაფეებით, ვიწყებთ დადიანის სასახლისა და ბოტანიკური ბაღის რესტავრაციას და ეს იქნება ერთ-ერთი საუკეთესო ადგილი", - განაცხადა პრეზიდენტმა და დასძინა, რომ სარეაბილიტაციო სამუშაოები ზუგდიდში ხვალიდან დაიწყება.
