ხელშეკრულებას საქართველოს მხრიდან ხელს მოაწერეს საქართველოს ფინანსთა მინისტრმა დიმიტრი გვინდაძემ და გერმანიის მხრიდან KfW-ს გარემოს დაცვისა და ინფრასტრუქტურის ჯგუფის ხელმძღვანელმა არნე გოსსმა.

ხელშეკრულების ფარგლებში გერმანიის მთავრობის მიერ გრანტის სახით გამოიყოფა 4,0 მლნ ევრო დასავლეთ საქართველოში იძულებით გადაადგილებულ პირთათვის საცხოვრებელი პირობების გაუმჯობესებისათვის. აღნიშნული ფინანსური რესურსი დაემატება გერმანიის მთავრობის მიერ KfW-ს გავლით ამ პროექტისათვის უკვე გამოყოფილ 6,0 მლნ ევროს. პროექტის ფარგლებში მოხდება იძულებით გადაადგილებულ პირთა საცხოვრებელი სახლების რეაბილიტაცია და ახალი საცხოვრებელი სახლების მშენებლობა.

„4 მლნ ევროს ოდენობის გრანტი უნდა მოხმარდეს დევნილთა საცხოვრებელი პირობების გაუმჯობესებას დასავლეთ საქართველოში. რეალურად, ესაა მეორე ეტაპი იმ პროექტისა, რომელსაც KfW-სთან ერთად ვახორციელებთ ბოლო წლებია. პროექტი გულისხმობს კოლექტიური ცენტრების რეაბილიტაციას და ახალი სახლების მშენებლობას დევნილთათვის დასავლეთ საქართველოს რამდენიმე ქალაქში. საუბარია, ქუთაისსზე წყალტუბოზე, ფოთსა და ზუგდიდზე. შესაბამისად, ძალისხმევა, რომელსაც ბოლო წლების განმავლობაში ამ მიმართულებით ვახორციელებდით, სრული მასშტაბით გაგრძელდება 2011-2012 წლებში," - განაცხადა ფინანსთა მინისტრმა.

„გერმანიის მთავრობამ ეს გრანტი იმისთვის გამოყო, რათა იძულებით გადაადგილებულმა პირებმა უკეთეს გარემოში იცხოვრონ და სოციალური პრობლემები გადაჭრან. ფოთში, ქუთაისსა და ზუგდიდში სარეაბილიტაციო სამუშაოები ცოტა ხანში დაიწყება," - განაცხადა KfW-ს გარემოს დაცვისა და ინფრასტრუქტურის ჯგუფის ხელმძღვანელმა არნე გოსსმა.

პროექტის ფარგლებში ამ ეტაპისათვის დასრულდა სარეაბილიტაციო სამუშაოები წყალტუბოს ყოფილ ელმეურნეობის სანატორიუმში, რის შედეგად გაუმჯობესებული საცხოვრებელი ბინები ხელმისაწვდომი გახდა 24 ოჯახისათვის; ფოთში მიმდინარეობს ყოფილი სასტუმრო "აიეტი"-ს სრული რეაბილიტაცია. უახლოეს მომავალში სარეაბილიტაციო სამუშაოები დაიწყება ქუთაისში, ყოფილი სამუსიკო სკოლა-ინტერნატის საერთო საცხოვრებელის გაუმჯობესების მიზნით. ამ სამუშაოების დასრულების შემდეგ კიდევ 162 ოჯახი შეძლებს ახალ გარემონტებულ ბინებში შესახლებას. დამატებითი დაფინანსების ფარგლებში იგეგმება ქ. ზუგდიდში 10 კორპუსიანი საცხოვრებელი უბნის მშენებლობა, რომელშიც დამატებით 320 ოჯახს გადაეცემა ახალი, გარემონტებული საცხოვრებელი ბინები.

დამატებითი დაფინანსების ხელშეკრულება არის ნაწილი „საქართველოს მთავრობასა და გერმანიის ფედერაციული რესპუბლიკის მთავრობას შორის ფინანსური თანამშრომლობის შესახებ" გაფორმებული შეთანხმებისა, რომელსაც ფინანსთა მინისტრმა და საქართველოში გერმანიის ფედერაციული რესპუბლიკის ელჩმა ხელი მოაწერეს მიმდინარე წლის 25 ოქტომბერს.

აღსანიშნავია ისიც, რომ გერმანიის მთავრობისგან მიღებულია დაპირება, დამატებით დაახლოებით 75 მლნ ევრომდე ფინანსური რესურსის გამოყოფასთან დაკავშირებით, მათ შორის:

9 მლნ ევრო გამოყოფილია მცირე და საშუალო ზომის საწარმოების მხარდასაჭერად (Agricultural Finance Programme), რომლებიც აწარმოებენ, ამუშავებენ და ყიდიან სასოფლო სამეურნეო პროდუქციას. პროგრამა ითვალისწინებს სოფლის მეურნეობის დარგში მცირე ბიზნესის დაკრედიტების ხელშეწყობას საქართველოში მოქმედი კომერციული ბანკების და მიკროსაფინანსო ორგანიზაციების გავლით.
20 მლნ ევრო გამოიყოფა განახლებადი ენერგიების სფეროში ინვესტიციების განხორციელების მიზნით (Renewable Energy Programme). პროგრამა მიზნად ისახავს მცირე ჰიდროელექტროსადგურების რეაბილიტაციას და მისი დაფინანსება განხორციელდება საქართველოში მოქმედი კომერციული ბანკების შუამავლობით.
4.25 მლნ ევრო გრანტის სახით (Promotion of Protected Areas) მოხმარდება საქართველოში დაცული ტერიტორიების გაუმჯობესებას და მათი გეოგრაფიული არეალის გაფართოებას. რეგიონული მასშტაბით 13.5 მლნ ევრო გრანტის სახით გამოიყო გარემოს დაცვის კუთხით ინსტიტუციონალური გაძლიერების ხელშეწყობის მიზნით.
ქ. ბათუმის ცენტრში სანიაღვრე სისტემის გაუმჯობესებისთვის გამოიყო 7 მლნ ევრო.
გერმანული მხარე სწავლობს შესაძლებლობას, ქართულ მხარეს აღმოუჩინოს მხარდაჭერა ეკოლოგიურად მდგრადი თანამედროვე ნაგავსაყრელის მოწყობის პროექტის განხორციელებაში.
მიმდინარე საკანონმდებლო და სამართლებრივი რეფორმების მხარდასაჭერად გრანტის სახით, ტექნიკური თანამშრომლობის კუთხით, დამატებით გამოიყო 5 მლნ ევრო (Support to Legal and Judicial Reforms).