"საქსტატის" ინფორმაციით, ნოემბერში წინა თვესთან შედარებით საქართველოში ინფლაციის დონემ 0,7 პროცენტი შეადგინა.
მოცემულ პერიოდში ინფლაციის მაჩვენებლის ფორმირებაში ძირითადი გავლენა იქონია ფასების ცვლილებამ შემდეგ ჯგუფებზე: სურსათისა და უალკოჰოლო სასმელების ჯგუფის ფასები გაიზარდა 0,6 პროცენტით და მისმა
წვლილმა ნოემბრის თვის ინფლაციაში 0,29 პროცენტული პუნქტი შეადგინა. ფასების მნიშვნელოვანი ზრდა დაფიქსირდა შემდეგ ქვეჯგუფებზე: ბოსტნეული, ბაღჩეული, კარტოფილი და სხვა ბოლქოვანები (10,5 პროცენტი), რძე, ყველი და კვერცხი (3,3 პროცენტი), თევზეული (1,4
პროცენტი). ფასები მნიშვნელოვნად შემცირდა შემდეგ ქვეჯგუფებზე: ხილი და ყურძენი (12,7 პროცენტი), პური და პურპროდუქტები (2,5 პროცენტი).
ფასები გაიზარდა ასევე ჯანმრთელობის დაცვის ჯგუფზე და ზრდამ 0,7 პროცენტი შეადგინა, ხოლო მისმა წვლილმა მთლიანი ინფლაციის მაჩვენებელში 0,06 პროცენტი შეადგინა. მნიშვნელოვანი ზრდა დაფიქსირდა
ასევე ფარმაცევტულ ნაწარმზე, მათ შორის: ვიტამინებზე (4,0 პროცენტი), სისხლძარღვთა გამაფართოებელ მედიკამენტებზე (1,2 პროცენტი) და ანტიბიოტიკებზე (1,0 პროცენტი).
"საქსტატის" ინფორმაციით, საანგარიშო პერიოდში ფასები გაიზარდა ასევე, ტრანსპორტის ჯგუფზე და ზრდამ 0,8 პროცენტი შეადგინა, ხოლო მისმა წვლილმა მთლიანი ინფლაციის მაჩვენებელში 0,1 პროცენტული პუნქტი შეადგინა. მნიშვნელოვანი ზრდა დაფიქსირდა საწვავ-საპოხ მასალებზე (2,4 პროცენტი) და სამოქალაქო საჰაერო ტრანსპორტზე (3,8 პროცენტი).