"გაზეთ "ვერსიის" ჟურნალისტები მმართველ კომპანიასა და დამფუძნებლებს შორის მოლაპარაკების სასწრაფოდ დაწყებას ითხოვენ. "გაზეთ "ვერსია" განცხადსებას ავრცელებს, რომელსაც გთავაზობთ უცვლელად:
"გაზეთ "ვერსიის" ჟურნალისტები პროტესტს ვაცხადებთ "მაესტროში" შექმნილი ვითარების გამო და მიგვაჩნია, რომ 30 ნოემბერს, ტელეკომპანიაში განვითარებული მოვლენები მხოლოდ ხელისუფლების სასარგებლოდ მუშაობს და ზიანს აყენებს არამარტო დამოუკიდებელი ტელეკომპანიის რეპუტაციასა და იმიჯს, არამედ ყველა ჟურნალისტს. ფაქტი აღმაშფოთებელია განსაკუთრებით იმ ფონზე, როცა გუშინ, 29 ნოემბერს, თბილისის მერიის წინ გაიმართა ბეჭდური მედიის ღია პროტესტი პრესის ჯიხურებთან დაკავშირებით, სადაც ნათლად გაცხადდა, რომ ბრძოლა გრძელდება. როგორც ჩანს, დღეს უკვე პრესის თითოეული ჯიხური კი, უკვე "მაესტრო" გვექნება ჟურნალისტებს დასაცავი. წინააღმდეგ შემთხვევაში, ჩვენს საპროტესტო სიტყვასაც კი ვეღარ მივაწვდეთ საზოგადოებას.
სასურველი იყო, მმართველ კომპანიასა და "მესტროს" დამფუძნებლებს შორის, ჯერ კიდევ რამდენიმე თვის წინ დაწყებული დავა, დახურულ კარსმიღმა, ცივილური გზით მოგვარებულიყო, თუმცა პარტნიორების მხრიდან დაშვებული შეცდომების გამო არ უნდა დაზარალდეს არც საზოგადოება (რომელმაც ტელეკომპანია "მაესტროსთვის" ერთხელ უკვე გადაიტანა დიდი ომი ხელისუფლებასთან) და არც ქართული ჟურნალისტიკის, ისედაც შელახული რეპუტაცია.
გაზეთ "ვერსია" სოლიდარობას უცხადებს "მაესტროს" ჟურნალისტებს და კატეგორიულად მოითხოვს, დამფუძნებლებმაც და მმართველმა კომანიამაც დატოვოს ტელეკომპანია "მაესტროს" შენობა, მოლაპარაკება დაიწყოს მათი ადვოკატების თანხლებით, ხოლო "მაესტროს" ჟურნალისტებს მიეცეს მუშაობის საშუალება. თუკი მხარეებს შორის, კონტრაქტით დაკისრებული ვალდებულებები, მოლაპარაკების გზით ვერ გაირკვევა, მათ უნდა მიმართონ სასამართლოს.
გაზეთ "ვერსიის" გამომცემელი, მაია ფურცელაძე"
