ახალი ამბების სააგენტო „ჯი-ეიჩ-ენი" მხარს უჭერს ტელეკომპანია „მაესტროს" შემოქმედებით ჯგუფს და უერთდება საზოგადოებისა და მედიის წარმომადგენელთა მოთხოვნას - აღდგეს ტელეკომპანიის მაუწყებლობა სრული ფორმატით.
სააგენტო მიმართავს „მაესტროს" დამფუძნებლებსა და მმართველი კომპანიის ხელმძღვანელებს, რომ მათ შორის არსებული გაუგებრობები და უთახმოებები გაარკვიონ ცივილური ფორმით კანონისა და ურთიერთშორის გაფორმებული ხელშეკრულების საფუძველზე, ისე, რომ საზოგადოებასა და ტელეკომპანიაში დასაქმებულ ჟურნალისტებსა და სხვა პირებს არ მიადგეს ზიანი.
კატეგორიულად ვგმობთ და წინაღმდეგნი ვართ „მაესტროს" თემის პოლიტიკური ანგაჟირებასა და მივიჩნევთ, რომ აღნიშნული საკითხის გადაწყვეტაში არ უნდა ჩაერიონ პოლიტიკური ძალები. ტელეკომპანიაში არსებული შიდაგაუგებრობა დამფუძნებლებისა და მმართველის კომპანიის გასარკვევია და მისი პოლიტიზირება დაუშვებელია.
ქართულმა მედიამ ექსტრემალურ ვითარებაში არაერთხელ აჩვენა სოლიდარობისა და კონსოლიდაციის მაგალითი და ამაჟამადაც რჩება იმის იმედი, რომ მედიის წარმომადგენლები მხარს დაუჭერენ მაესტროს ჟურნალისტებს, რომელიც ქართული მედიის თავისუფლებისა და დამოუკიდებლობისთვის აუცილებელია.
