სამოქალაქო აქტების შესახებ კანონპროექტში უცნაური ჩანაწერი გაჩნდა. ამ ჩანაწერის მიხედვით: მამის გარდაცვალების შემთხვევაში, ბავშვი დაქორწინებული მშობლებისაგან წარმოშობილად ჩაითვლება, თუ იგი დაიბადა მამის გარდაცვალებიდან არა უგვიანეს 10 თვისა.

სამოქალაქო აქტების შესახებ ახალ კანონპროექტის განხილვა პარლამენტში ჯერ არ დაწყებულა. მასში ასევე აღნიშნულია, რომ დაქორწინებული მშობლებისაგან ბავშვის წარმოშობა დგინდება მეუღლეთა ერთობლივი ან ერთ-ერთი მათგანის განცხადებით, ბავშვის დაბადებისა და მშობელთა ქორწინების დამადასტურებელი დოკუმენტებით.
"~ქორწინებაში არმყოფი მშობლებისგან ბავშვის წარმოშობა დგინდება მშობლების ერთობლივი განცხადებით და ბავშვის დაბადების დამადასტურებელი დოკუმენტით. თუ ბავშვი შეეძინება დაუქორწინებელ დედას და არ არსებობს მშობელთა ერთობლივი განცხადება ან სასამართლოს გადაწყვეტილება მამობის დადგენის შესახებ, დაბადების აქტის ჩანაწერში ბავშვის მამის შესახებ მონაცემები არ მიეთითება" - ნათქვამია კანონპროექტში.