"საქსტატს" სტატისტიკის განვითარების ეროვნული სტრატეგია აქვს, რომელიც 2011-2014 წლებს მოიცავს. სტრატეგიაში დეტალურადაა გაწერილი სტატისტიკის ეროვნული სამსახურის სამომავლო გეგმები.
"სტატისტიკის განვითარების პირველი ეროვნული სტრატეგია მსოფლიო ბანკის ტექნიკური და ფინანსური მხარდაჭერით მომზადდა. დოკუმენტის არსებობა მნიშვნელოვანია თვითონ სტატისტიკის ეროვნული სისტემისთვის. ეს არის ევროკავშირისა და "ევროსტატის" უშუალო მოთხოვნა, რომ გვქონდეს ხანგრძლივადიანი სტრატეგია. სტრატეგიაში გაწერილია სამსახურის გეგმები უახლოესი 3 წლის განმავლობაში. სტატისტიკის ეროვნულ სამსახურში მრავალი რეფორმა გატარდა და კიდევ ბევრია გასაკეთებელი. ბუნებრივია მომავალში ჩვენს უცხოელ პარტნიორებთან ერთად, ძალიან ბევრს ვგეგმავთ და სტრატეგიაში ზუსტად არის გაწერილი უახლოესი 3 წლის განმავლობაში თუ რა უნდა გაკეთდეს, მეთოდოლოგიური ცვლილებების, მუშაობის გაუმჯობესებისა, თუ საველე სამუშაოების გაუმჯობესების კუთხით"- აღნიშნა "საქსტატის" აღმასრულებელმა დირექტორმა ზაზა ჭელიძემ.
როგორც ცნობილია, ეროვნული სტრატეგია მომზადდა საერთაშორისო რეკომენდაციების საფუძველზე მსოფლიო ბანკის სატრასტო ფონდის მხარდაჭერით და მოიცავს 2011-2014 წლებისთვის საქართველოს ოფიციალური სტატისტიკის განვითარების ძირითად მიმართულებებს. სტრატეგია რამდენიმე ნაწილისგან შედგება: სტატისტიკის სფეროში არსებული მდგომარეობის შეფასება, ძირითადი გამოწვევები და პრიორიტეტებზე დაფუძნებული დეტალური სამუშაო პროგრამა.
საქართველოს სტატისტიკის ეროვნულმა სამსახურმა "საქსტატის" ვებ-გვერდზე განათავსა სტატისტიკის განვითარების ეროვნული სტრატეგია, სადაც ნებისმიერ მომხმარებელს შეუძლია გაეცნოს აღნიშნულ მასალას.