დღეს, 30 ნოემბერს სომხეთის რესპუბლიკის პრეზიდენტის სერჟ სარგსიანის ოფიციალური ვიზიტის ფარგლებში სასტუმრო "რადისონ ბლუ ივერიაში" 12:00 საათზე საქართველო-სომხეთის ბიზნეს ფორუმი გაიმართება. ქართულ-სომხურ ბიზნეს-ფორუმს გახსნის საქართველოს პრეზიდენტი მიხეილ სააკაშვილი, მონაწილეებს მიესალმება სომხეთის რესპუბლიკის პრეზიდენტი. ღონისძიების ორგანიზატორებია საქართველოს ეროვნული საინვესტიციო სააგენტო საქართველოს სავაჭრო-სამრეწველო პალატასთან ერთად.
ოფიციალური ნაწილის დასრულების შემდგომ ფორუმის მეორე ნაწილი დაეთმობა ინდივიდუალურ შეხვედრებს ქართული და სომხური კომპანიების წარმომადგენლებს შორის.
სომხური მხრიდან წარმოდგენილი იქნება კომპანიები შემდეგი სფეროებიდან: საბანკო და სადაზღვევო სექტორი, მშენებლობა, უსაფრთხოებისა და გათბობის სისტემები , გადაზიდვები, საკვები პროდუქტები, ფარმაცევტიკა, საიუველირო ნაწარმი, ინფორმაციული ტექნოლოგიები და ტელეკომუნიკაციები. ფორუმის ფაგრლებში ასევე წარმოდგენილი იქნებიან ფეხსაცმლისა და ტანსაცმლის ექსპორტიორები. ფორუმს დაესწრება 100-მდე ქართული კომპანიის წარმომადგენელი.
საქართველოს ეროვნული საინვესტიციო სააგენტოს წარმომადგენელი დამსწრე საზოგადოებას გააცნობს ქვეყანაში არსებულ ბიზნეს კლიმატს, ეკონომიკის პრიორიტეტულ სექტორებს და საქართველოში ბიზნესის განვითარების შესაძლებლობებს.
აღსანიშნავია, რომ ნოემბრის დასაწყისში საქართველოს ეკონომიკისა და მდგრადი განვითარების მინისტრის ვერა ქობალიას სომხეთში ოფიციალური ვიზიტის ფარგლებში ეროვნული საინვესტიციო სააგენტოს ორგანიზებით ქ. ერევანში გაიმართა საქართველო სომხეთის ბიზნეს ფორუმი. ღონისძიებას დაესწრნენ ადგილობრივი ბიზნეს წრეების წარმომადგენლები. 2011 წლის 17-18 ნოემბერს ქ. ბათუმში გაიმართა საქართველო-სომხეთის სამთავრობათაშორისო კომისიის სხდომა, რომელსაც თავჯდომარეობდნენ საქართველოს პრემიერ მინისტრი ნიკა გილაური და სომხეთის პრემიერ მინისტრი ტიგრან სარგსიანი. სამთავრობათაშორისო კომისიის სხდომაზე განსახილველ საკითხებს შორის იყო თანამშრომლობა ინვესტიციების კუთხით.