საქართველოში ჩინელი ბიზნესმენების მიერ 150 მლნ აშშ დოლარის ინვესტიცია განხორციელდება. საქართველოს პარლამენტში დღეს გააფორმეს "ხუალინის საერთაშორისო სპეციალური ეკონომიკური ზონის" შექმნასთან დაკავშირებით მემორანდუმი. მას ხელი მოაწერეს საქართველოს ეკონომიკისა და მდგრადი განვითარების მინისტრმა ვერა ქობალიამ და ჩინელმა ინვესტორებმა.
მემორანდუმის თანახმად, "სინძიანის ხუალინის სავაჭრო-სამრეწველო ჯგუფი" ვალდებულებას იღებს, რომ თბილისში "ხუალინის სპეციალურ ეკონომიკურ ზონაში" 2015 წლის თამაშებისთვის ააშენებს: საცხოვრებელ სასტუმროს, რომლის საერთო ფართი 65 000 კვმ-ს არ უნდა აღემატებოდეს, ბაზრის ტერიტორიას, საწარმოო და სასაწყობე ფართს, საცხოვრებელ კომპლექსს, ასევე, სარეკრეაციო და დასასვენებელ ზონას.
გაფორმებული დოკუმენტის მიხედვით, ჩინური მხარის ინვესტიცია არანაკლებ 150 მილი აშშ დოლარს უნდა შეადგენდეს.
მემორანდუმზე ხელმოწერას პარლამენტის თავმჯდომარე დავით ბაქრაძე ესწრებოდა. მისი შეფასებით, ეს მემორანდუმი, ქვეყანაში დიდი მოცულობის ინვესტიციას საფუძველს ჩაუყრის.
"ეს მემორანდუმი თბილისში სპეციალური ეკონომიკური ზონის მშენებლობას საფუძველს ჩაუყრის. უნდა გვესმოდეს, რომ საუბარია, ძალიან დიდ კომპლექსზე, სადაც თავმყორილი იქნება კომერციული ფართები და გასართობი ცენტრები. აქ კი, ძალიან ბევრი ადამიანი დასაქმდება. რაც შეეხება ინფრასტრუქტურას, ქალაქი კარგ ახალ უბანს და ახალ სასტუმროს მიიღებს, რომელიც 2015 წლის ოლიმპიადისთვის იქნება გამოყენებული. ნებისმიერი ინვესტიცია ჩვენი ზრუნვის საგანი იქნება. ჩვენ მზად ვართ ყველაფრისთვის, როცა საქმე ჩვენი ეკონომიკის ინტერეს ემსახურება", - განაცხადა დავით ბაქრაძემ.
მსგავსი ტიპის პროექტი ჩინეთშიც განხორციელდა, სადაც დაახლოებით 40 ათასი ადამიანია დასაქმებული.
