"GIG TAXI"-ი თავის კლიენტებს სიურპრიზს უმზადებს. უფრო კონკრეტულად რა სახის სიურპრიზზეა საუბარი კომპანიაში არ აკონკრეტებენ. სააგენტო "ჯი-ეიჩ-ენთან" საუბრისას, "GIG TAXI" -ის მმართველი დირექტორი კოტე თოფურია განმარტავს, მხოლოდ იმას, რომ სიახლე 15 დეკემბრიდან ამოქმედდება და ეს მომხმარებლისათვის ნამდვილი სიურპრიზი იქნება.
როგორც ცნობილია, "GIG TAXI"-ი, კერძო კლიენტების გარდა, კორპორატიულ კლიენტებსაც ემსახურება. ამ ეტაპზე კომპანია 200-მდე კორპორატიულ კლიენტს ემსახურება. კერძო პირებისთვის მომსახურების ტარიფი 1 კმ-ზე საშუალოდ 50 თეთრია, ხოლო კორპორატიული კლიენტები შედარებით შეღავათიანი ტარიფებით სარგებლობენ.
ამ დროისთვის "GIG TAXI"-ი მხოლოდ თბილისშია წარმოდგენილი, თუმცა მას შემდეგ, რაც კომპანია ბაზარზე წილს გაზრდის, რეგიონებში სერვისცენტრების გახსნაზედაც იმსჯელებს.
"GIG TAXI"-ს აქვს ექსკლუზიური უფლება თბილისის საერთაშორისო აეროპორტთან, რომლის მიხედვითაც, მგზავრებისა და თავად კომპანია "ტავის" გადაადგილებაზე უშუალოდ "GIG TAXI"-ი ზრუნავს.
კომპანიაში აცხადებენ, რომ კომპანია კლიენტებს მოსახერხებელ გადაადგილებას სთავაზობს თბილისის საერთაშორისო აეროპორტსა და საქართველოს ნებისმიერ რეგიონს შორის. მგზავრებს საშუალება აქვთ, წინასწარ შეუკვეთონ აეროპორტში დახვედრა (ჩამოსვლის, გამგზავრებისას).
შეგახსენებთ, რომ კომპანია "GIG TAXI"-ი არის ტაქსებით მომსახურების წამყვანი კომპანიის, "ქართული საინვესტიციო ჯგუფი XXI"-ს ნაწილი. "GIG TAXI"-ი ქართულ ბაზარზე გამოჩნდა 2007 წელს, როდესაც განახორციელა მნიშვნელოვანი ინვესტიცია ტაქსებით მომსახურების სექტორში. კომპანიამ თბილისში მოღვაწეობა 2007 წლის სექტემბერში 100 ავტომანქანით დაიწყო. მოგვიანებით კომპანიამ შემოიყვანა დაახლოებით 330 მანქანა საქართველოში. 2009 წლის მარტში "GIG TAXI"-ს მიენიჭა "ხარისხის ნიშანი".