უკრაინელი და ქართველი ბიზნესმენების კიდევ ერთი შეხვედრა, ამჯერად, უკრაინაში. ოქტომბერში თბილისში გამართული საქართველო-უკრაინის ბიზნეს-ფორუმის შემდეგ, დნეპროპეტროვსკის სავაჭრო-სამრეწველო პალატისა და „რაკია საქართველოს" ორგანიზებით, ბიზნეს-ფორუმი უკრაინის ქალაქ დნეპროპეტროვსკში ტარდება. ფორუმზე მიწვეულია საქართველოს სავაჭრო-სამრეწველო პალატის პრეზიდენტი კახა ბაინდურაშვილი.
ფორუმში უკრაინული მხრიდან 100-ზე მეტი კომპანია მონაწილეობს, რომელიც დაინტერესებულნი არიან საქართველოში საქმიანი ურთიერთობების, ვაჭრობის, წარმოების, სოფლის მეურნეობის, ლოჯისტიკისა და სხვა სექტორების განვითარებით.
კახა ბაინდურაშვილი უკრაინულ კომპანიებს დეტალურად გააცნობს საქართველოში არსებულ საინვესტიციო გარემოს და მთავრობის მიერ გატარებულ რეფორმებს, რომლებიც ქვეყნის ბიზნესგარემოს გაუმჯობესებისთვის გატარდა.
ვიზიტის ფარგლებში დაგეგმილია კახა ბაინდურაშვილის შეხვედრა დნეპროპეტროვსკის სავაჭრო-სამრეწველო პალატის პრეზიდენტთან ვიტალი ჟმურენკოსთან და ორი ქყვეყნის სავაჭრო-სამრეწველო პალატებს შორის ურთიერთთანამშრომლობის შესახებ მემორანდუმზე ხელმოწერა.
