"საქართველოს ბანკმა" და "ტავ ოპერეიშენ სერვისმა" თბილისის საერთაშორისო აეროპორტში დღეს ერთობლივად საქართველოს ბანკის მიერ მოწყობილი "საქართველოს ბანკის პრაიმკლასის" დარბაზი გახსნეს. აღნიშნული ლაუნჯ-დარბაზი გაფორმებულია თანამედროვე დიზაინით, ‘საქართველოს ბანკის' კორპორატიულ ფერებში.
"საქართველოს ბანკი" თავის კორპორატიულ, აქტივებისა და დაგროვილი ქონების მართვის, ასევე SOLO მომსახურების კლიენტებს, თბილისის საერთაშორისო აეროპორტში პრივილეგირებულ მომსახურებას სთავაზობს. აღნიშნული პროექტის განხორციელება შესაძლებელი გახდა თბილისის საერთაშორისო აეროპორტის ოპერატორი კომპანია "ტავ ჯორჯიასა" და საქართველოს ბანკის მჭიდრო თანამშრომლობის შედეგად.
ბანკი თავისი შეხედულებისამებრ, კლიენტებს გადასცემს საქართველოს ბანკისა და "ტავ ჯორჯია ოპერეიშენ სერვისის" ერთობლივ ბარათს, რომელიც სპეციალურად ამ დანიშნულებით შეიქმნა.
ხსენებული ბარათების მფლობელები წლის განმავლობაში ისარგებლებენ გარკვეული რაოდენობის უფასო "პრაიმკლას სიპ მომსახურებით" გამგზავრებისა და მოფრენის დროს და ასევე შესაძლებლობა ექნებათ მიიღონ აღნიშნული მომსახურება სპეციალურ ფასად. მომსახურებაში შედის ორი, 6 წლამდე ასაკის ბავშვის მომსახურება უფასოდ და დამატებით, კლიენტები ასევე ისარგებლებენ სიპ-მომსახურების სპეციალური ფასით თავიანთი სტუმრებისთვის.