ბათუმის მერიასა და შპს "პიაცა ჰოლდინგს" შორის 2011 წლის 15 აპრილს გაფორმებულ ოქმში ცვლილებები შევიდა, რაც ბათუმის საკრებულომ უკვე დაამტკიცა.
ცვლილების მიხედვით, "პიაცა ჰოლდინგს" დარჩენილი 8,6 მლნ. ლარის გადახდა გადაუვადდა, სამაგიეროდ პაიცას მიმდებარედ ბათუმის მერია დაუსრულებელი სამუშაოებისათვის აღარ დაჯარიმდება, რასაც ბათუმის მერიასა და ინვესტორს შორის გაფორმებული ხელშეკრულება ითვალისწინებდა.
როგორც ცნობილია, თანხის ნაწილი, პირველი ხეშეკრულების მიხედვით, "პიაცა ჰოლდინგმა" 20 აგვისტომდე დაფარა, ხოლო თანხის დარჩენილი ნაწილი, 8,6 მლნ. ლარი 10 დეკემბრისთვის უნდა დაეფარა, თუმცა ბათუმის მერიისა და საკრებულოს გადაწყვეტილებით ინვესტორს თანხის დაფარვის ვადა 2012 წლის 31 მარტამდე გადაუვადდა.
ინვესტორსა და ბათუმის მერიას შორის გაფორმებული კონტაქტით, მერია ვალდებული იყო პაცას მიმდებარე ტერიტორიაზე ინფრასტრუქტურა აგვისტოს ბოლომდე მოესწრიგებინა, წინააღმდეგ შემთხვევაში მუნიციპალიტეტი ჯარიმდებოდა.
ძველი ბათუმის ისტორიული უბნებისა და ტურისტული ინფრასტრუქტურის რეაბილიტაციის პროგრამის ფარგლებში, პიაცას კომპლექსი ბათუმში 2010 წელს აშენდა. 14-სართულიანი, 5 700 კვ. მეტრზე აშენებული პიაცა ერთ-ერთი ძვირადღირებული პროექტი იყო. მასში 18 მლნ. 500 ათასი ლარი დაიხარჯა.
შემდგომ კი მრავალფუნქციური კომპლექსი ბათუმის მერიამ 11 მილიონ ლარად შპს „პიაცა ჰოლდინგს" პირობიანი აუქციონით მიყიდა. აუქციონზე „პიაცა" 10 მლნ. 900 ათას ლარად იყო გატანილი. კომპანია „პიაცა ჰოლდინგმა" 100 ათასი ლარით მეტი გადაიხადა და პიაცას 3 700 კვ. მეტრი ფართი შეიძინა.
აღსანიშნავია ისიც, რომ მოედნის დათმობა პირობის მიხედვით, წელიწადში მხოლოდ სამი ღონისძიებისთვის მოუწევს ახალ მფლობელს. ყველა მნიშვნელოვანი კონცერტი კი გასული წლის შემდეგ სწორედ, პიაცაზე გაიმართა.
შპს „პიაცა ჰოლდინგ" 2011 წლის 23 თებერვალს საფუძნდა. ხოლო, ბათუმის მერიის 17 მარტის პირობიან აუქციონში კომპანიის სახელწოდების „სეხნია" _ ბათუმის პიაცა შეიძინა. „პიაცა ჰოლდინგის" 100 % წილის მფლობელი და დირექტორი რუსეთის მოქალაქე ირაკლი სამხარაძეა, რომელიც მოსკოვში ცხოვრობს.