ვისოლმა აღმოსავლეთ-დასავლეთის ჩქაროსნული ავტო-მაგისტრალის გორის მონაკვეთზე დასვენებისა და მომსახურების კომპლექსის პრეზენტაცია გამართა. სტრატეგიული მნიშვნელობის მქონე კომპლექსის გახსნას საქართველოს პრეზიდენტი მიხეილ სააკაშვილი და რეგიონული განვითარების მინისტრი რამაზ ნიკოლაიშვილი დაესწრნენ.
ვისოლის დასვენებისა და მომსახურების კომპლექსი მულტიფუნქციურია და რამოდენიმე მომსახურების ობიექტს მოიცავს. აქ განთავსებულია ვისოლის ავტო და გაზგასამართი სადგურები, ფრანგული ნავთობ-გიგანტის ტოტალის ზეთებისა და საპოხი მასალების შეცვლისა და ვუკლანიზაციის ობიექტები, სუპერმარკეტი "სმარტი" პროდუქტების ფართო არჩევანით და "სმარტ კაფე"-სწრაფი კვების ობიექტი. აქვე განთავსდა სოფლის მეურნეობის პროდუქტების სავაჭრო კუთხეც, სადაც გლეხები თვითონვე მოახდენენ საკუთარი ხილ-ბოსტნეულის გაყიდვას. კომპლექსის ტერიტორიაზე საკმაოდ დიდი ადგილი გამოეყო სატვირთო მანქანების, ავტობუსებისა და მსუბუქი მანქანების პარკირების ზონას.
„ახალ ჩქაროსნულ მაგისტრალზე დასვენებისა და მომსახურების კომპლექსი ვისოლ ჯგუფის ყველაზე მსხვილი და ამავდროულად უაღრესად მნიშვნელოვანი პროექტია. საქართველო დღითიდღე უფრო საინტერესო ხდება უცხოელი ტურისტებისათვის და გადამზიდავი კომპანიებისათვის. ასეთი კომპლექსის არსებობა კი მათ მოგზაურობას საქართველოში და საქართველოს გავლით შეუდარებლად უფრო კომფორტულს გახდის. ამას გარდა, საქართველოს მოსახლეობას საშუალება ექნება ჩქაროსნულ ავტო-მაგისტრალზე მგზავრობისას გზად დაისვენოს და უაღრესად კომფორტულ გარემოში ყველა საჭირო სერვისით ისარგებლოს. ჩვენთვის ასევე მნიშვნელოვანია ისიც, რომ აღვადგინეთ ძველი ტრადიცია და გზის პირას სოფლის მეურნეობის პროდუქტების რეალიზაციისათვის სრულიად განსხვავებული, კომფორტული სივრცე მოვუწყვეთ ადგილობრივ გლეხებს", - აცხადებს ვისოლ ჯგუფის სამეთვალყურეო საბჭოს თავმჯდომარე სოსო ფხაკაძე.
დასვენებისა დამომსახურების კომპლექსის შექმნისათვის ვისოლ ჯგუფმა რამოდენიმე მილიონი ლარის ინვესტიცია განახორციელა. დასვენებისა და მომსახურების ცენტრის სამშენებლო სამუშაოებს ვისოლ ჯგუფის შვილობილი სამშენებლო კომპანია სს „დელტა ჰოლდინგი" ახორციელებდა. მშენებლობის პერიოდში მუდმივად 150-ზე მეტი ადამიანი იყო დასაქმებული.
"ჩვენთვის განსაკუთრებით ღირსეულია ის ფაქტი, რომ არქიტექტორული და კონსტრუქციული კუთხით ასეთი რთული ნაგებობების შექმნა ქართულმა სამშენებლო კომპანიამ საკუთარი ძალებით შესძლო და ეს ყველაფერი რეკორდულ დროში - 14 თვეში იქნა შესრულებული, რასაც ჩვენი კომპანიის ყველა წევრის ძალიან დიდი შრომა და ძალისხმევა ახლდა თან" - აცხადებს სს "დელტა ჰოლდინგის" გენერალური დირექტორი ლევან კალმახელიძე.
კომპლექსის დასაქმებულთა რიცხვი ამ დროისათვის 100-მდე ადამიანს მოიცავს, რომელთა შორისაცაა რუსეთის აგრესიის შედეგად იძულებით გადაადგილებული პირები. ყველა მათგანმა ვისოლ ჯგუფის აკადემიაში სპეციალური სწავლება გაიარა.
კომპლექსის არქიტექტურა ცნობილ გერმანელ არქიტექტორს იურგენ მაიერს ეკუთვნის. საქართველოს მხრიდან კი პროექტზე ცნობილი არქიტექტორები "ქობულია და პარტნიორები" მუშაობდნენ.