ჩეხეთში სამუშაო ვიზიტად მყოფი საქართველოს პრემიერ-მინისტრი Energo pro-ს წარმომადგენლებს შეხვდა. შეხვედრაზე გადაწყდა, რომ Energo pro საქართველოში ახალი ჰესის მშენებლობას დაიწყებს.
„ექსპორტ ბანკი-ს" მეშვეობით საკმაოდ დიდი ინვესტიციები ხორციელდება ენერგეტიკაში. საუბარი გვაქვს ახალ პროექტებზე ტრანსპორტში, ჩეხეთის კერძო სექტორი საქართველოს სოფლის მეურნეობით არის დაინტერესებული. ჩეხეთის მთავრობისგან პოლიტიკური მხარდაჭერა გვაქვს, რათა ჩეხეთის „ექსპორტ ბანკმა" გააგრძელოს იაფიანი კრედიტების გამოყოფა ჩეხური კომპანიებისთვის, რომ მათ განაგრძონ ინვესტირება საქართველოში"- განაცხადა ნიკა გილაურმა.
პრემიერ-მინისტრის თქმით, ის ასევე შეხვდება ტრქტორების მწარმოებელ ერთერთ უმსხვილესი ქარხნის წარმომადგენლებს, რომელიც საქართველოში მნიშვნელოვანი ცენტრის გაკეთებითაა დინტერესებული. კომპანია საქართველოში ახალი ტრაქტორების მწარმოებელი ქარხნის აშენებას გეგმავს.
შეგახსენებთ, რომ პრაღაში საქართველოს პრემიერ-მინისტრი ჩეხეთის რესპუბლიკის პრემიერ-მინისტრს პეტრ ნეჩასს (Petr Nečas) უკვე შეხვდა.
„ჩეხეთის პრემიერ-მინისტრმა ხაზგასმით აღნიშნა, რომ ნატო-ს მომავალი წლის სამიტზე ჩეხეთი საქართელოს ევროატლანტიკურ სივრცეში ინტეგრაციას მხარს დაუჭერს. ჩეხეთი ევროკავშირთან საქართველოს ურთიერთოებების მხარს უჭერს, იგულისხმება თავისუფალი ვაჭრობის ხელშეკრულება, ლიბერალიზაცია, შემდეგ გადასადგმელი ნაბიჯები. ჩეხეთის მხარდაჭერა ყველა ამ მიმართულებით გვაქვს.
აღსანიშნავია, რომ ძალიან მნიშვნელოვანია საქართველოს და ჩეხეთს შორის ეკონომიკური ურთიერთობები. დღეს საქართველოში ჩეხეთი ერთერთი ყველაზე დიდი ინვესტორია, ჩეხეთის „ექსპორტ ბანკი" ერთერთი ყველაზე მნიშვნელოვანი ინვესტორია საქართველოში," - აღნიშნა საქართველოს პრემიერ-მინისტრმა შეხვედრის შემდეგ.
ნიკა გილაურმა შეხვედრა გამართა ასევე ჩეხეთის პირველ-ვიცე პრემიერთან, საგარეო საქმეთა მინისტრთან კარელ შვარცენბერგთან (Karel Schwarzenberg). შეხვედრაზე საუბარი შეეხო საქართველოსა და ჩეხეთის ურთიერთობებს, აგრეთვე ნატო-სა და ევროკავშირში საქართველოს ინტეგრაციის საკითხებს.