2011 წლის პირველ ნახევარში საქართველოს ეკონომიკა 5,5 %-ით გაიზარდა, ამის შესახებ "საქსტატის" აღმასრულებელმა დირექტორმა ზაზა ჭელიძემ განაცხადა.
ზაზა ჭელიძის განმარტებით, 2011 წლის ორი კვარტლის წინასწარი მონაცემებით, რეალური ზრდის მაჩვენებელია 5,5 %-ია, ხოლო შარშანდელი დაზუსტებული მონაცემებით, საქართველოს ეკონომიკა 6,3 %-ით გაიზარდა
"2010 წელი იყო პოსტკრიზისული და ის ძვრები რომელიც საქართველოს ეკონომიკას ახასიათებდა უფრო პოზიტიური იყო ვიდრე ეს იყო წინა წლებში. რაც შეეხება წლევანდელ წელს, რასაც ჩვენ ვუყურებთ - გარდა იმისა რომ ვითვლით ეკონომიკურ ზრდას, ასევე ვაკერთებთ წინასწარ კვლევებს - საქართველოს ეკონომიკა 2010 წელთან შედარებით კიდევ უფრო გაიზრდება"- აღნიშნა ზაზა ჭელიძემ.
სტატისტიკური ინფორმაციით თანახმად, 2011 წლის პირველ კვარტალში დაუზუსტებელი ინფორმაციით, საქართველოს ეკონომიკა 6,1 %-ით გაიზარდა, ხოლო მეორე კვარტალში 4,9 %-ით.
"საქსტატის" ინფორმაციით, მთლიანი შიდა პროდუქტის გაანგარიშება კვარტალების მიხედვითYხორციელდება ყოველთვიური და ყოველკვარტალური მონაცემების საფუძველზე. შესაბამისად, აუცილებელი ხდება მთლიანი შიდა პროდუქტის წლიური დაზუსტება წლიური მონაცემების გათვალისწინებით. წლიური მონაცემები, როგორც წესი განსხვავდება კვარტალური მონაცემებისაგან. წლიურ დაზუსტებასთან ერთად საერთაშორისო პრაქტიკაში მიღებულია დინამიკური მწკრივების ერთიანი ცვლილება, რომელიც ხორციელდება ხუთ წელიწადში ერთხელ და ითვალისწინებს ამ პერიოდში მომხდარ მეთოდოლოგიურ ცვლილებებს ან ახალი გამოკვლევების შედეგად მიღებული მონაცემების გამოყენების საჭიროებას.
სტატისტიკის ეროვნულ სამსახურში აღნიშნავენ, რომ გასული წლის წლიური მონაცემების მიღებასთან ერთად, ხელახლა ითვლება მიმდინარე წლის კვარტალური მონაცემებიც. მაგალითად, 2011 წლის პირველი და მეორე კვარტალის მონაცემები თავდაპირველად გაანგარიშდა 2010 წლის წინასწარი
მონაცემების საფუძველზე. ხოლო 2011 წლის ნოემბერში, 2010 წლის წლიური
მონაცემების დაზუსტებასთან და 2010 წლის კვარტალური მონაცემების
ცვლილებასთან ერთად შეიცვალა 2011 წლის პირველი და მეორე კვარტლის
მონაცემებიც. შესაბამისად, 2012 წლის ნოემბერში საბოლოოდ დაზუსტდება 2011 წლის წლიური მაჩვენებლები. დაზუსტების შედეგად წლიური მთლიანი შიდა პროდუქტის რეალური ზრდა შემცირდა 0,1 პროცენტით და შეადგინა 6,3 პროცენტი.