29 ნოემბერს 10:30 საათზე, ფინანსთა სამინისტროს აკადემიასა და მცირე და საშუალო ბიზნესმენთა ასოციაციას შორის ურთიერთთანამშრომლობის მემორანდუმი გაფორმდება. მემორანდუმს ხელს აკადემიის დირექტორი სერგო ნოზაძე და ასოციაციის პრეზიდენტი გიორგი ისაკაძე მოაწერენ.
შეთანხმების თანახმად, მხარეები მონაწილეობას მიიღებენ ფინანსთა სამინისტროს სისტემაში განხორციელებულ რეფორმებთან, საკანონმდებლო თუ პროცედურულ სიახლეებთან დაკავშირებით ერთობლივი სამუშაო შეხვედრების, სემინარების, კონფერენციებისა და საზოგადოებრივი პროექტების განხორციელებაში, ჩაერთვებიან ერთობლივი დასაქმების ფორუმებისა და სოციალური პროექტების ორგანიზებაში. ამასთან, ბიზნესის საჭიროებათა უკეთ შესწავლის მიზნით იგეგმება ერთობლივი გასვლითი შეხვედრების ორგანიზება რაიონებში - ადგილობრივი მცირე და საშუალო ბიზნესის წარმომადგენლებთან.
ბიზნეს სექტორთან აქტიური თანამშრომლობა და მისი განვითარების ხელშეწყობა ფინანსთა სამინისტროს აკადემიის ერთერთი მთავარი პრიორიტეტია. ამ მიზნის მისაღწევად ის ბიზნეს სექტორს საკონსულტაციო მომსახურებასა და მათ მოთხოვნებზე მორგებულ სასწავლო კურსებს სთავაზობს.
მასალის გამოყენების პირობები