საქართველოს საგარეო საქმეთა მინისტრის მოადგილის ნინო კალანდაძის განცხადებით, საქართველოს საგარეო საქმეთა სამინისტროს არ აქვს ოფიციალური ინფორმაცია საქართველოს საზღვრებზე ტვირთების მონიტორინგთან დაკავშირებით ტენდერში გამარჯვებული კომპანიის შესახებ.
„უახლოეს ხანებში გაიმართება კონსულტაციები შვეიცარულ მხარესთან, რომელიც ვალდებულია, ქართულ მხარეს აცნობოს იმის თაობაზე, თუ რა პირობებში გაიმართა ტენდერი და რომელი კომპანია გამოვლინდა გამარჯვებულად. მთავარია, რომ ჩვენ ვენდობით შვეიცარიის არჩევანს. შეთანხმების მიხედვით, შვეიცარია ირჩევს შესაბამის კომპანიას და გამოავლენს გამარჯვებულს. ეს კომპანია შვეიცარულ მხარის მიმართ არის ანგარიშვალდებული", - განმარტა კალანდაძემ.
მისი თქმით, ნებისმიერი კომპანია, რომელიც გამარჯვებულად გამოვლინდება, შვეიცარიის მიერ გულდასმით იქნება შერჩეული.
შეგახსენებთ, რომ რუსული მედიაში გავრცელებული ინფორმაციის თანახმად, საქართველოსა და რუსეთის ვაჭრობის მსოფლიო ორგანიზაციაში გაწევრიანების შესახებ მოლაპარაკებების საფუძველზე ჩატარდა ტენდერი და გაიმარჯვა შვეიცარულმა კომპანიამ SGS-მა, რომელსაც რუსეთში 48 ფილიალი აქვს.