საქართველოს საგარეო საქმეთა მინისტრის მოადგილის ნინო კალანდაძის განცხადებით, ე.წ. სამხრეთ ოსეთში რაც მიმდინარეობს არ განიხილება როგორც არჩევნები. მისი თქმით, ეს არის ღონისძიება, რომელიც დაგეგმილი არის კრემლში , ხელმძღვანელობს ოფიციალური მოსკოვი და მის შედეგებზე პასუხისმგებელი არის სწორედ ოფიციალური მოსკოვი.
„საქართველოს ოკუპირებულ რეგიონებზე იმართება საქართველოსთან შეუთანხმებელი ღონისძიებები. მათ შორის, სამწუხაროდ, ადგილი აქვს ადამიანის უფლებების დარღვევას. კიდევ ერთხელ ვამბობ, ამაზეც პასუხისმგებელი არის ის ორგანიზატორი, რომელიც ხელმძღვანელობს ამ ვითარებას. იმედი გვაქვს, რომ საერთაშორისო თანამეგობრობას ადეკვატური გამოხმაურება ექნება. თუმცა არ მგონია, რომ საერთაშორისო გამოხმაურება თავის რეაქციას დააყოვნებს", - განაცხადა მინისტრის მოადგილემ დღეს გამართულ ტრადიციულ ბრიფინგზე,
მისი თქმით, ე.წ. პირველი ტურის შემდეგ საერთაშორისო თანამეგობრობის მხრიდან სწრაფი და ადეკვატური გამოხმაურება მოჰყვა.
„როგორც აშშ-მა, ასევე ევროკავშირმა ერთიანი ხმით დაგმეს იქ მიმდინარე მოვლენები. გამოხმაურება მოჰყვა ჩვენი სამეზობლო რეგიონიდან და ჩვენ ვფიქრობთ, რომ იქ მიმდინარე მოვლენებთან დაკავშირებით ძალიან ადეკვატური შეფასება აქვს საერთაშორისო თანამეგობრობას", - აღნიშნა კალანდაძემ.
