საქართველოს კათოლიკოს-პატრიარქმა ილია მეორემ მოსკოვში ვიზიტისას რუსეთის ხელისუფლებას ქართველი მეფეების სამშობლოში გადასვენების შესახებ თხოვნით მიმართა, - ინფორმაციას ამის შესახებ "იტარ-ტასი" ავრცელებს.
საუბარია ქართველი მეფეების ვახტანგ მეექვსესა და თეიმურაზ მეორის შესახებ, რომლებმაც თავიანთი სიცოცხლის უკანასკნელი წლები რუსეთში გაატარეს. ქართველი მეფეები, ასტრახანის ღვთისშობლის მიძინების ტაძარში არიან დაკრძალული.
„მეფეებს სურვილი ჰქონდათ, რომ სამშობლოში დაკრძალულიყვნენ. მათ ანდერძი დატოვეს. ჩვენ ვთხოვეთ რუსეთის პრეზიდენტსა და პატრიარქ კირილს, რათა მათი საქართველოში გადასვენების უფლება მოგვცენ", -აღნიშნა ილია მეორემ.
მისი განცხადებით, რუსულ მხარეს უკვე გადასცეს ყველა აუცილებელი დოკუმენტი. მისივე თქმით, აღნიშნული საკითხი განხილვის სტადიაშია.
