მინისტრმა კობა სუბელიანმა და შვეიცარიის სრულუფლებიანმა ელჩმა საქართველოში გუენტერ ბეხლერმა ხელი მოაწერეს ურთიერთგაგების მემორანდუმს, რომელიც დევნილებისთვის ინდივიდუალური სახლების მშენებლობას ითვალისწინებს.
მემორანდუმის - „წყალტუბოში მდებარე იძულებით გადაადგილებულ პირთა კერძო ჩასახლების მაცხოვრებლების მდგრადი განსახლების პირობებით უზრუნველყოფა" მიხედვით, იდივიდუალურ საცხოვრებელ სახლს 35 დევნილი ოჯახი მიიღებს. ეს ის დევნილები არიან, რომლებიც ამჟამად წყალტუბოში, „კოტეჯი 1-ის" დასახლებაში ამორტიზირებულ კოტეჯებში ცხოვრობენ. 35-ვე კოტეჯი დაინგრევა და მათ ნაცვლად ახალი, ინდივიდუალური სახლები აშენდება.
ყველა სახლი აღჭურვილი იქნება სააბაზანო და მისაღები ოთახით, რომელიც მოიცავს სამზარეულოს, ასევე საძინებელი ოთახებით ოჯახების სულადობის გათვალისწინებით (მაგ: 1-2 პირისთვის განკუთვნილ სახლს ექნება 1 საძინებელი, 2-4 პირისთვის განკუთვნილ სახლს - 2 საძინებელი, ხოლო 5-6 პირისთვის განკუთვნილ სახლს - 3 საძინებელი).
როგორც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა აღნიშნა, დევნილები ახალ სახლებში შემოდგომაზე გადავლენ.
„საქართველოსა და შვეიცარიის მთავრობის ერთობლივი დაფინანსებით, იმ დევნილებისთვის, რომლებიც „კოტეჯი 1"-ის უბანში გაუსაძლის პირობებში ცხოვრობდნენ, ახალი სახლები აშენდება. მშენებლობა მომავალი წლის შემოდგომისთვის დასრულდება და ეს იქნება მათი საკუთრება. მნიშვნელოვანია, რომ მათ სხვაგან გადასვლა არ მოუწევთ, რადგან იქაურ გარემოში არიან ადაპტირებულები", - განაცხადა მინისტრმა.
ელჩის თქმით, ეს ძალიან მნიშვნელოვანი პროექტია, რომელიც 35 დევნილი ოჯახის მუდმივი საცხოვრებლით დაკმაყოფილებას ითვალისწინებს.
"ის კოტეჯები, სადაც აღნიშნული ოჯხები დღეს ცხოვრობენ, 1995 წელს აშენდა და უკვე ძალიან ცუდ მდგომარეობაშია. სექტემბერში ეს ოჯახები უკვე ახალ სახლებში გადავლენ საცხოვრებლად", - განაცხადა ელჩმა.
დევნილთა გრძელვადიანი საცხოვრებელი პირობებით დაკმაყიფილების პროცესი გრძელდება და ეტაპობრივად საცხოვრებელ ფართს ყველა დევნილი ოჯახი მიიღებს.
სახლების მშენებლობა 2012 წლის სექტემბერში დასრულდება.
