საქართველოს პრეზიდენტმა მიხეილ სააკაშვილმა რიყეზე რონალდ რეიგანის ქანდაკება გახსნა. საქართველოს პრეზიდენტის თქმით, საზოგადოების მწირე ნაწილს გაუჩნდა კითხვა, თუ რატომ არ განთავსდა ეს ძეგლი ამერიკის საელჩოსთან.
"მე მინდა ვნახოთ ისტორიული კონტექსტი და მინდა გავიხსენო რეიგანის სიტყვები: "მე ძალიან კარგად ვიცი გულის სიღრმეში, რომ ადამიანი ფუნდამენტურად არის დადებითი მოვლენა და სიმართლე და სიკეთე ყოველთვის იმარჯვებს". მინდა სასახლის ფასადს შევხედოთ და ამოვიკითხოთ რუსთაველის ციტატა: "ბოროტსა სძლია კეთილმან, არსება მისი გრძელია". ჩვენ ვიმყოფებით აქ, ბარათაშვილის ქუჩაზე, ბარათაშვილის ძეგლთან, ბარათაშვილის აღმართის მიმდებარე ტერიტორიაზე. მინდა წავიკითხოთ რონალდ რეიგანის ციტატა: "მოდით, გავაკეთოთ ყველაფერი იმისთვის, რომ ვინც ჩვენ შემდეგ მოვა, თქვას, რომ ჩვენ გავაკეთეთ ყველაფერი, რისი გაკეთებაც შეგვეძლო - ბოლომდე მივიყვანეთ ეს რბოლა, შევუნარჩუნეთ შემდგომ თაობებს თავისუფლება, არ დავკარგეთ გამარჯვების რწმენა". და ბარათაშვილი ისევ: "ცუდად ხომ მაინც არ ჩაივლის ეს განწირული სულისკვეთება და გზა უვალი, შენგან თელილი, მერანო ჩემო, მაინც დარჩება", - განაცხადა პრეზიდენტმა.
