დღეს, 23 ნოემბერს, 16:00 საათზე, ქობულეთის მუნიციპალიტეტში საზოგადოებრივი პროექტის `ქობულეთის სამება - მხარის ახალი სულიერებისა და კულტურის ცენტრი" პრეზენტაცია გაიმართება.
ღოგორც ორგანიზატორებმა "ჯი-ეიჩ-ენს" აცნობეს, პროექტი გულისხმობს ამ მხარის წმიდა სამების სახელობის ტაძრების შესახებ შექმნილი სპეციალური ვებ-გვერდის ამოქმედებას, სოფელ ქვედასამებაში ახალი ტაძრის დაწყების მხარდაჭერას, ქობულეთის წმიდა სალოცავების წარსულისა და თანამედროვეობის შესწავლას, დოკუმენტაციას და მოცემულ ვებ-გვერდზე განთავსებას.
ქობულეთში მოცემული ღონისძიება გიორგობის დღესასწაულისადმი მიძღვნილი კულტურული ღონისძიებების ფარგლებში მოეწყობა. მას სამღდელოებასთან, მუნიციპალიტეტის ხელმძღვანელობასთან და რიგით მოქალაქეებთან ერთად, ინიციატივის მხარდამჭერი მედია-ორგანზიაციის ხელმძღვანელებიც დაესწრებიან.
ქობულეთში საზოგადოებრივი ინიციატივა ბათუმისა და ლაზეთის მიტროპოლიტის, მეუფე დიმიტრის ლოცვა-კურთხევით ხორციელდება. ინიციატივის მხარდამჭერთა შორისაა ქობულეთის მაჟორიტარი დეპუტატი საქართველოს პარლამენტში ოთარ ხინიკაძე, ქობულეთის მუნიციპალიტეტის საკრებულო, სხვადასხვა საზოგადოებრივი ორგანიზაცია და მედია-გამოცემა.
`ქობულეთს თამამად შეუძლია იამაყოს საკუთარი წინარექრისტიანული, ქრისტიანული, შემდგომი დროის სულიერი და კულტურული ცხოვრებით, თანამედროვე ეკლესია-მონასტრების არსებობითა და განვითარებით, თუმცა ქობულეთის სამება უნდა გახდეს ამ კუთხის ახალი სულიერი და კულტურული ცხოვრების დაწყების საწინდარი." - ნათქვამია პროექტში.
