ქვეყნის ქვედა პალატის 98 დეპუტატის არჩევა, კანონმდებლობის მიხედვით, მოხდება პროპორციული წესით - პარტიული სიებით და პირდაპირი და ფარული კენჭისყრით. 9 დეპუტატს აირჩევს ყაზახი ხალხის ასამბლეა, რომლის სხდომაც 2012 წლის 16 იანვარს გაიმართება. ცენტრალურ საარჩევნო კომისიას დაევალა ვადამდელი არჩევნების ჩატარების ორგანიზება, ხოლო ქვეყნის მთავრობას არჩევნების მატერიალურ-ტექნიკური და ფინანსური საკითხების ორგანიზება. ქვედა პალატის არჩევნები 2012 წლის აგვისტოში უნდა გამართულიყო, თუმცა პარლამენტის 53-მა წევრმა მიმართა ქვეყნის პრეზიდენტს, ქვედა პალატის ვადამდე დათხოვნის შესახებ. გადაწყვეტილების მოტივაციად პარლამენტარებმა დაასახელეს ერთ პარტიული საპარლამენტო სისტემიდან მრავალ პარტიულ საპარლამენტო სისტემაზე გადასვლის აუცილებლობა. კანონის მიხედვით, მომავალ პარლამენტში მინიმუმ 2 პოლიტიკური ძალა უნდა იყოს წარმოდგენილი. დეპუტატებმა აღნიშნეს, რომ მომავალ წელს მოსალოდნელია ახალი ეკონომიკური კრიზისები, რომელიც შესაძლოა შეეხოს ყაზახეთსაც და აღნიშნულიდან გამომდინარე ქვეყანაში ეკონომიკური პრობლემების დადგომამდე აუცილებელია "ელექტორალური" პერიოდის გავლა.