"დღეს მინდა ვისაუბრო კონდოლიზა რაისის მემუარებზე, რომლის ნაწილიც შეეხება 2008 წლის აგვისტოს ომს. მხედველობაში მაქვს კონდოლიზა რაისის განცხადება, რომლითაც მან კიდევ ერთხელ დაადასტურა ის, რაც მე არაერთგზის მითქვამს და რის გამოც სააკაშვილმა და მისმა თანამოაზრეებმა ქვეყნის მოღალატედ შემრაცხეს. მინდა შეგახსენოთ, რომ რამდენიმე ინტერვიუში მოვუყევი საზოგადოებას ჩემი ბოლო შეხვედრის შესახებ კონდოლიზა რაისთან პარლამენტის თავმჯდომარის რანგში. შეხვედრისას მან მითხრა, რომ არავითარ შემთხვევაში სააკაშვილმა თავის არ მისცეს უფლება ჩაერთოს რაიმე ტიპის პროვოკაციაში რომელიც, შესაძლოა, მოდიოდეს ოსური ან რუსული მხარის მიერ. მან ასევე განმიცხადა, რომ ასევე, არავითარ შემთხვევაში არ დაგვეშვა პირდაპირი სამხერდო დაპირისპირება რუსეთთან. რადგან მისი თქმით, მიუხედავად საქართველოსა და აშშ-ს სტრატეგიული ურთიერთობისა, აშშ ვერ და არ დაიწყებდა რუსეთთან ომს. მან ხაზგასმით განმიცხადა, რომ ჩვენ დავრჩებოდით მარტო და ჩვენ ომს წავაგებდით. ეს სიტყვები მე მაქვს ნათქვამი ჯერ კიდევ წელიწადნახევრის წინ და მე ეს სიტყვა-სიტყვით გადმოვეცი სააკაშვილს რაისთან შეხვედრის დასრულებისთანავე, ასევე ჩვენი პირადი საუბრის დროს. მე მას ეს სიტყვები გაუხსენე 2008 წლის 3 აგვისტოსაც, როდესაც მე მას ბოლოჯერ შევხვდი ომის დაწყების წინ და გავაფრთხილე, რომ მისი მხრიდან საომარ მოქმედებებში ჩართვა და მით უფრო ომის დაწყება იქნებოდა ქვეყნისთვის დამღუპველი და დამაქცეველი", - განაცხადა ბურჯანაძემ.

მისი თქმით, მის ამ სიტყვებს ადასტურებს კონდოლიზა რაისი თავის მემუარებში და ამბობს: "მე კიდევ ერთხელ საქართველოში ვიზიტის დროს შევახსენე მიხეილ სააკშვილს რომ აშშ არ დაიწყებდა ომს რუსეთთან საქართველოსთვის და საქართველო დარჩებოდა მარტო და ომს წააგებდა".

ბურჯანაძის თქმით, რაისის მემუარებში კიდევ ერთი საინტერესო დეტალია, სადაც ის ამბობს, რომ მეამბოხენი აგრძელებდნენ ქართული სოფლების დაცხრილვას, მაგრამ სააკაშვილმა პასუხად საქართველოს შეიარაღებული ძალების მხრიდან გახსნა მძიმე ცეცხლი მეამბოხეების წინააღმდეგ. ბურჯანაძის განმარტებით, აქ მნიშვნელოვანია რომ რაისი აღნიშნავს, ესენი იყვნენ მეამბოხეები და არა როგორც სააკაშვილი ამბობს - რუსული შენაერთები.

"ეს კიდევ ერთხელ ადასტურებს ტალიავინისა და მრავალი ევროპელი ექსპერტის დასკვნას და კიდევ იმას, რაც არაერთხელ მითქვამს, რომ ომის თავიდან აცილება იყო შესაძლებელი. ეს ომი დაიწყო მართალია პროვოცირებების შემდეგ, მაგრამ სწორედ სააკაშვილის მიერ ცხინვალის დაბომბვის ბრძანების გაცემის გამო. სააკაშვილისა და მისი ხელისუფლების და იმ ადამიანების ბრალია ქვეყნის ტერიტორიების 20 პროცენტის დაკარგვა, რომლებიც ამბობდნენ, რომ საქართველოს შეძლებდა რუსეთის დამარცხებას. თუმცა ტერიტორიების დაკარგვა არის დროებითი, რადგან სიმართლე აუცილებლად გაიმარჯვებს და ხელისუფლებაში მოვა ის ძალა, რომელსაც რეალურად შეეძლება ამ კონფლიქტების მოგვარება", - აღნიშნა ბურჯანაძემ.